ప్రధానిపై రాహుల్ గాంధీ ఘాట విమర్శలు

యూపీ ఎన్నికల ప్రచారంలో ప్రధాని నరేంద్ర మోడీపై కాంగ్రెస్ పార్టీ అగ్రనేత రాహుల్ గాంధీ ఘాటు వ్యాఖ్యలు చేశారు. ప్రధానమంత్రి నరేంద్ర మోడీ భారతదేశంలో నిరుద్యోగ సమస్యను పరిష్కరించలేదని రాహుల్ గాంధీ మండిపడ్డారు. ప్రధాని నరేంద్ర మోడీ ఆయన స్నేహితులు భారతదేశ ఉపాధి వెన్నెముకను విరగ్గొట్టారని కాంగ్రెస్ నేత రాహుల్ గాంధీ ఆరోపించారు. ఎన్నికల ర్యాలీలో వయనాడ్ ఎంపీ రాహుల్ గాంధీ మాట్లాడుతూ ఆరోపణలు చేశారు. రాబోయే కాలంలో ఈ దేశంలోని యువతకు ఉపాధి దొరకదని ఆందోళన వ్యక్తం చేశారు. కోవిడ్ సమయంలో తన మాట ఎవరూ వినలేదని, ఫలితంగా గంగలో మృతదేహాలను చూశారని పేర్కొన్నారు. బిజెపి నాయకులకు గుణపాఠం నేర్పాల్సిన అవసరం ఉందని రాహుల్ గాంధీ పేర్కొన్నారు. ప్రజలకు ఉపాధి అవకాశాలు కల్పించకపోవడంపై ప్రభుత్వ విధానాలను ప్రశ్నిస్తూ.. ఎన్నికల ప్రసంగాల్లో ప్రధాని మోడీ ఉపాధి గురించి ఎందుకు మాట్లాడరు అంటూ ప్రశ్నించారు. ఉత్తరప్రదేశ్‌కు వచ్చినప్పుడు ఉద్యోగాల గురించి ఎందుకు చెప్పరు? అని నిలదీశారు. రాష్ట్ర యువతకు ఉద్యోగావకాశాలు కల్పిస్తామనీ, 2014లో ఉపాధి అవకాశాలు కల్పిస్తామని, ఎంత మందికి ఉపాధి కల్పించామని, రానున్న కాలంలో మరెంత మందికి ఉపాధి కల్పిస్తామని ఎందుకు చెప్పడం లేదు అని రాహుల్ గాంధీ ప్రధాని మోడీ ని టార్గెట్ చేశారు. ప్రధాని మోడీ అన్ని అబద్ధాలు చెబుతున్నారని ఆరోపించారు. అధికారంలో ఉన్న 70 ఏళ్ళలో కాంగ్రెస్ హయాంలో ఏమీ జరగలేదని బిజెపి నాయకులు చేస్తున్న ఆరోపణలకు ఎదురుదాడి చేసిన రాహుల్ గాంధీ అవును వాస్తవానికి 70 ఏళ్ళలో అంబానీలకు, అదానీ లకు ఏమీ జరగలేదని ప్రజలు గుర్తించాలన్నారు. భారతదేశంలోని అతిపెద్ద బిలియనీర్లకు తాము ఉపాధి ఇవ్వలేదని, తాము సామాన్య ప్రజలకు ఉపాధి కల్పించామని రాహుల్ గాంధీ వెల్లడించారు. కార్పోరేట్ సంస్థలకు దోచిపెట్టే సంస్కృతి బీజేపీకే ఉందని ఆయన పేర్కొన్నారు. రైతుల ఆదాయం రెట్టింపు చేస్తానని ప్రధాని హామీ ఇచ్చారని, కానీ నల్ల చట్టాలను అమలు చేశారని మండిపడ్డారు. రద్దు చేయబడిన వ్యవసాయ చట్టాల లక్ష్యం రైతులు పొందుతున్న వాటిని లాక్కొని బిలియనీర్ల కు కట్టబెట్టడం అని రాహుల్ గాంధీ వ్యాఖ్యానించారు.