సమయస్పూర్తితో వ్యవహరించింది...ఎంతో మంది ప్రాణాలను కాపాడింది

ప్రతి మనిషికి సమయస్పూర్తి అవసరం. అలాంటి సమయస్పూర్తితో ఎంతో మంది ప్రాణాలను ఓ మహిళా కాపాడింది. ఉత్తరప్రదేశ్‌లో అనూహ్య సంఘటన చోటుచేసుకుంది. ఓ మహిళ తన చీరతో ఎంతోమంది ప్రాణాలను కాపాడింది. రైలు పట్టాలపై నడుచుకుంటూ వెళ్తున్న పెద్దావిడకు.. పట్టాలు విరిగిపోవడం కనిపించింది. అటుగా ట్రైన్ వస్తుందని తెలుసుకుని, తన ఒంటిపై ఉన్న ఎర్ర చీరను ఉపయోగించి ట్రైన్‌ను ఆపింది. దీంతో పెనుప్రమాదం తప్పింది. దీంతో ఎంతో మంద్రి ప్రాణాలు నిలిచాయి. ఉత్తరప్రదేశ్ ఎటా జిల్లా అవగాఢ్ మండలం‌ గులేరియా గ్రామాని చెందిన ఓంవతీ దేవీ (65) గురువారం ఇంటి నుంచి రైలు పట్టాల మీదుగా పొలానికి వెళ్లింది. అయితే కుస్బా రైల్వే స్టేషన్ సమీపంలో ఒక పట్టా విరిగి ఉండడాన్ని ఆమె చూసింది. అయితే అటువైపుగా రైలు వస్తుందని గ్రహించిన ఆమె పట్టాలు విరిగిపోయాయయనే విషయాన్ని ఎవరికైనా చెప్పాలనుకుంది. కానీ ఎలా చెప్పాలో, ఎవరికి చెప్పాలో తెలియలేదు. దాంతో అటుగా వచ్చే ట్రైన్ డ్రైవర్‌ను అప్రమత్తం చేయాలనుకుంది. రెండు చెట్ల కొమ్మలను నరికి పట్టాలపై అటుఇటు పాతి వాటికి తన ఒంటిపై ఉన్న ఎర్ర చీరను తీసి కట్టింది. కొద్దిసేపటికి ఎటా నుంచి టుండ్లా వెళ్తున్న పాసింజర్ రైలు వచ్చింది. అడ్డంగా కట్టిన ఎర్ర చీరను చూసి డ్రైవర్ ట్రైన్‌ను ఆపి కిందకు దిగి... అక్కడ రైలు పట్టా విరిగిపోయి ఉండడాన్ని చూశారు. వెంటనే ఉన్నతాధికారులకు ఆ విషయాన్ని తెలియజేశారు. దాంతో సిబ్బంది వచ్చి రైలు పట్టాలను సరిచేశారు. ఇంత మంది ప్రాణాలను కాపాడిన ఓంవతీ దేవిని వారు అభినందించారు. ఆమె వద్దంటున్నా వంద రూపాయలు కూడా అందజేశారు. గంట తర్వాత మళ్లీ ట్రైన్ అక్కడ నుంచి బయల్దేరి వెళ్లింది. ఈ సంఘటనకు సంబంధించిన ఫోటోలను, వీడియోను ఉత్తరప్రదేశ్ పోలీసు అధికారి సచిన్ కౌషిక్ ట్విట్టర్‌లో పోస్ట్ చేశారు. "ఓంవతి ఉదయం తన పొలంలో పనికి వెళ్తుండగా విరిగిన ట్రాక్‌లను గుర్తించింది. రైలు రాబోతుండగా, ప్రమాద సంకేతంగా ఎర్ర చీరను ట్రాక్‌పై కట్టింది" అని ఆయన ట్వీట్‌లో పేర్కొన్నారు. కాగా ఎరుపు రంగు ప్రమాదానికి సంకేతమని తనకు తెలుసునని, అందుకే చీరను తీసి అడ్డంగా కట్టానని ఓంవతి కూడా చెప్పింది. అయితే ఆమె సమయస్ఫూర్తిపై నెటిజన్లు ప్రశంసలు కురిపిస్తున్నారు. భారతీయులు ఎవరూ తమ బాధ్యతను మరిచిపోరని కామెంట్లు కూడా పెడుతున్నారు.