పదహారేళ్లు వయస్సులోనే ఆ ఎత్తు...అశ్చర్యపర్చుతున్న ఆ కుర్రాడు

పేరు ఆలివర్ రియోక్స్. వయసు 16 ఏళ్లు. ఎత్తు 7 అడుగుల 5.33 అంగుళాలు అంటే 226.9 సెంటీమీటర్లు. సాధారణంగా 18 ఏళ్ల వయసు వరకూ పిల్లలు హైట్ పెరుగుతారు. ఆ లెక్కన ఆలివర్ మరింత ఎత్తు పెరిగే ఛాన్స్ ఉంది. గిన్నీస్ వరల్డ్ రికార్డ్స్ వారు ఈ కుర్రాడికి సంబంధించిన వీడియోని శనివారం రిలీజ్ చేశారు. ప్రపంచంలోనే అతి ఎత్తైన మగ టీనేజర్ (టీనేజర్ అంటే 13 ఏళ్ల నుంచి 18 ఏళ్ల మధ్య వయస్సు వారు - అని క్యాప్షన్ ఇచ్చారు. ఆ వీడియోని చూస్తే అడుగడుగునా ఆశ్చర్యంగానే ఉంటుంది. అతని కటౌట్ చూస్తేనే వామ్మో అనిపించేలా ఉన్నాడు. బాస్కెట్ బాల్ ఆడే ఆలివర్.. అత్యంత తేలిగ్గా గోల్ చేస్తున్నాడు. ఏప్రిల్ 3న పోస్ట్ చేసిన ఈ వీడియోని ఇప్పటికే 7.5 లక్షల మందికి పైగా చూడగా... 94 వేల మందికి పైగా లైక్ చేశారు. ఆలివర్‌కి గిన్నీస్ రికార్డైతే వచ్చింది గానీ... ఈ హైట్ పెద్ద సమస్యే. వీడియోలో చూశారుగా ఇంట్లోకి వెళ్లాలంటే వంగి వెళ్లాల్సి వస్తోంది. కారు అతనికి ఏమాత్రం సరిపోనిదిలా ఉంది. అతని పక్కన ఎవరు ఉన్నా... చిన్నగా కనిపిస్తున్నారు. అందువల్ల అదోరకమైన అసౌకర్యం. బయటకు వెళ్లే అంతా అతన్నే వింత మనిషిని చూసినట్లు చూస్తారు. "వామ్మో ఇంత హైట్ ఉన్నాడేంటీ... ఏదైనా సమస్య ఉందేమో" అనుకునే పరిస్థితి. ఆలివర్ నిజానికి 15 ఏళ్ల వయసప్పుడే చాలా హైట్ ఉండటంతో... 2021 సెప్టెంబర్‌లోనే ప్రపంచంలో అతి ఎత్తైన టీనేజర్‌గా గుర్తింపు పొందాడు. టీనేజ్ దాటేశాక... ప్రపంచంలోనే ఎత్తైన వ్యక్తిగా మారే ఛాన్స్ ఉంది. జీడబ్ల్యూఆర్ వెబ్‌సైట్ ప్రకారం ఈ కుర్రాడు పుట్టినప్పుడే 3 కేజీల 400 గ్రాముల బరువున్నాడు. నెల తిరిగేసరికి బరువు 7 కేజీలు దాటేశాడు. ఐదో తరగతి చదివేటప్పటికి... 5 అడుగుల 2 అంగుళాల ఎత్తు పెరిగాడు.