విలీనంతో షేర్ బ్యాంక్ జంప్

ఆర్థిక రంగంలో మరో అతిపెద్ద విలీనానికి తెరతీసింది మార్టగేజ్ లెండర్ హెచ్‌డీఎఫ్‌సీ. హెచ్‌డీఎఫ్‌సీ బ్యాంకులో విలీనమవుతున్నట్టు సోమవారం ఈ మార్టగేజ్ సంస్థ ప్రకటించింది. దీంతో విలీన సంస్థ మార్కెట్ క్యాపిటలైజేషన్ రూ.12.8 లక్షల కోట్లకు ఎగియనుంది. అంతేకాక దేశంలోనే మూడో అతిపెద్ద సంస్థగా కూడా ఇది అవతరించబోతుంది. విలీనం తర్వాత.. హెచ్‌డీఎఫ్‌సీ బ్యాంకు 100 శాతం పబ్లిక్ షేర్‌హోల్డర్ల చేతిలో ఉంటోంది. హెచ్‌డీఎఫ్‌సీ లిమిటెడ్‌లోని ప్రస్తుత షేర్‌హోల్డర్లు బ్యాంకులో 41 శాతం వాటాను పొందనున్నారు. హెచ్‌డీఎఫ్‌సీ లిమిటెడ్‌లో రెండు రూపాయల ఫేస్ వాల్యుతో 25 షేర్లు ఉన్న షేర్లు ఉన్నవారికి, హెచ్‌డీఎఫ్‌సీ బ్యాంకులో ఒక రూపాయి ఫేస్ వాల్యు కలిగిన 42 షేర్లు లభించనున్నాయి. ఈ విలీన ప్రకటన వెలువడగానే.. ట్రేడింగ్ ప్రారంభంలోనే హెచ్‌డీఎఫ్‌సీ బ్యాంకు షేర్లు 10.29 శాతం పెరిగి రూ.1,661కు జంప్ చేశాయి. అలాగే హెచ్‌డీఎఫ్‌సీ షేర్లు 12.61 శాతం లాభంలో రూ.2,761.50కు ఎగిశాయి. ఈ విలీనంతో షేర్ హోల్డర్లకు లాభాల పంట పండుతోంది. బ్యాంకు షేర్లు స్కై రాకెట్‌లా దూసుకెళ్తున్నాయి. నిఫ్టీ 50లో అతిపెద్ద వెయిటేజ్ కలిగిన స్టాక్‌గా కూడా ఇది మారబోతున్నట్టు అనలిస్టులు చెప్పారు. ప్రస్తుతం రిలయన్స్ ఇండస్ట్రీస్ 11.9 శాతం వెయిటేజ్‌ను కలిగి ఉంది. ‘‘హౌసింగ్ ఫైనాన్స్‌లోకి వచ్చిన 45 ఏళ్ల తర్వాత.. 90 లక్షల మంది ఇండియన్లకు సొంతింటి కలను సాకారం చేసిన తర్వాత.. మేము మా కోసం ఓ ఇంటిని వెతుకున్నాం. మా సొంత కంపెనీలోనే మాకు ఇల్లు దొరికింది’’- విలీన ప్రకటన తర్వాత హెచ్‌డీఎఫ్‌సీ లిమిటెడ్ ఛైర్మన్ దీపక్ పరేఖ్ ఆసక్తికర వ్యాఖ్యలు చేశారు. హెచ్‌డీఎఫ్‌సీ లిమిటెడ్ రూ.5.26 లక్షల కోట్ల అసెట్స్ అండర్ మేనేజ్‌మెంట్‌తో దేశంలోనే అతిపెద్ద హౌసింగ్ కంపెనీగా ఉంది. దీని మార్కెట్ క్యాప్ రూ.4.44 లక్షల కోట్లు. హెచ్‌డీఎఫ్‌సీ బ్యాంకు ఆస్తుల పరంగా దేశంలోనే అతిపెద్ద ప్రైవేట్ బ్యాంకు. ఈ బ్యాంకు ఆస్తులు రూ.19.38 లక్షల కోట్లుగా ఉంటాయి. బ్యాంకు మార్కెట్ క్యాప్ కూడా రూ.8.35 లక్షల కోట్లు. హెచ్‌డీఎఫ్‌సీ లిమిటెడ్‌కు చెందిన సబ్సిడరీలు, అసోసియేట్లు హెచ్‌డీఎఫ్‌సీ బ్యాంకు సబ్సిడరీలుగా, అసోసియేట్లుగా మారబోతున్నాయి. ఈ విలీనంతో హౌసింగ్ ఫైనాన్స్ సరికొత్త స్థాయిలకు ఎగుస్తుందని హెచ్‌డీఎఫ్‌సీ లిమిటెడ్ ఛైర్మన్ దీపక్ పరేఖ్ చెప్పారు. అంతేకాక హెచ్‌డీఎఫ్‌సీ బ్యాంకు తన ప్రస్తుత కస్టమర్ బేస్‌తోనే హౌసింగ్ లోన్ పోర్టుఫోలియోను అభివృద్ధి చేసుకోనుంది. ఈ మెర్జర్ తర్వాత బ్యాంకులో 41 శాతం లావాదేవీలను హెచ్‌డీఎఫ్‌సీ పొందనుంది. ఆర్‌బీఐ, ఇతర రెగ్యులేటరీ అథారిటీల ఆమోదాల మేరకే ఈ విలీనం ఉన్నట్టు ఇరు సంస్థలు చెప్పాయి.