పెట్రోల్, డీజీల్ బాటలోనే సీఎన్జీ గ్యాస్ ధరలు

పెట్రోల్, డీజీల్ ధరల పెంపు బాటలోనే సీఎన్జీ గ్యాస్ ధరలు పయనిస్తున్నాయి. దేశంలో పెరుగుతోన్న ద్రవ్యోల్బణంతో వాహనాన్ని నడపడం ఇక కష్టంగా మారబోతుంది. ఒక వైపు నుంచి పెట్రోల్, డీజిల్ ధరలు భగ్గుమంటుండటంతో.. మరోవైపు నుంచి సీఎన్‌జీ ధరలు పెరిగి డ్రైవర్లను హడలెత్తిస్తున్నాయి. ఇంద్రప్రస్థా గ్యాస్ లిమిటెడ్(ఐజీఎల్) గత మూడు రోజుల్లో రెండుసార్లు సీఎన్‌జీ ధరలను పెంచింది. శుక్రవారమే దేశ రాజధానిలో సీఎన్‌జీ ధరలను 80 పైసలు పెంచిన ఇంద్రప్రస్థా గ్యాస్ లిమిటెడ్.. సోమవారం మరోసారి కేజీపై రూ.2.50 ధర పెంచింది. మూడు రోజుల వ్యవధిలోనే రెండుసార్లు ఈ పెంపును చేపట్టి డ్రైవర్లకు ఝలకిచ్చింది. దీంతో సీఎన్‌జీ ధరలు ఈ మూడు రోజుల్లో కేజీకి రూ.3.30 పెరిగాయి. గ్యాస్ ఇన్‌పుట్ ఖర్చులు పెరుగుతుండటంతో.. ధరలు పెంచామని కంపెనీ చెబుతోంది. పెరుగుతోన్న పెట్రోల్, డీజిల్ ధరల నుంచి తప్పించుకునేందుకు.. వాహనదారులు సీఎన్‌జీ వాహనాలను వాడుతూ ఉంటారు. కానీ వీటి ధరలు కూడా పెరుగుతూ వాహనదారులను హడలెత్తిస్తున్నాయి. కేవలం నాలుగు వారాల్లోనే.. సీఎన్‌జీ ధరలు ఆరుసార్లు పెరిగాయి. కేవలం ఇది మాత్రమే కాదు, 2022 ఏడాది ప్రారంభమైనప్పటి నుంచి ఇప్పటి వరకు కేజీ సీఎన్‌జీపై రూ.8.50 ధర పెరిగింది. దీంతో ఢిల్లీలో కేజీ సీఎన్‌జీ ధర రూ.64.11కు చేరుకుంది. లిక్విడ్ నేచురల్ గ్యాస్(ఎల్ఎన్‌జీ) ధరలు కూడా పెరిగాయి. అంతర్జాతీయ మార్కెట్లో ఇటీవల కాలంలో ఎల్ఎన్‌జీ ధరలు గణనీయంగా పెరుగుతుండటంతో.. ప్రభుత్వం కూడా గత వారం ఈ ధరలను రెండింతలకు పైగా పెంచింది. ఒక్కో బ్రిటీష్ థర్మల్ యూనిట్ ధరను 2.9 డాలర్ల నుంచి 6.10 డాలర్లకు పెంచింది ప్రభుత్వం. దీని ప్రభావం ఎల్‌పీజీ సిలిండర్లపై కనిపించనుంది. సీఎన్‌జీ, పీఎన్‌జీ ధరలు పెరుగుతాయి. ఇదిలావుంటే గత 14 రోజులలో 12 సార్లు పెట్రోల్, డీజిల్ ధరలను పెంచాయి ఆయిల్ మార్కెటింగ్ కంపెనీలు. దీంతో లీటరు ఆయిల్‌పై రూ.8.40 మేర ధర పెరిగింది. గతేడాది నవంబర్ 4 నుంచి ఈ ఏడాది మార్చి 21 వరకు స్తబ్దుగా ఉన్న పెట్రోల్, డీజిల్ ధరలు.. ప్రస్తుతం వాహనదారులకు చుక్కలు చూపిస్తున్నాయి. పెరుగుతోన్న ధరలపై కస్టమర్లు నిరాశ వ్యక్తం చేస్తున్నారు. ప్రతి రోజూ ఆయిల్ ధరలు పెంచడం కాదని, దీనికి ఒక పరిష్కారం కనుగొనాలని సూచిస్తున్నారు. సీఎన్‌జీ ధరలు పెరిగినందున, క్యాబ్‌లలో ప్రయాణికులకు ఎయిర్ కండీషనర్లు ఇవ్వమని ఢిల్లీలో ఓ క్యాబ్ డ్రైవర్ చెప్పారు. పెరుగుతోన్న ధరలు తమ బడ్జెట్‌పై ప్రభావం చూపుతున్నాయని పేర్కొన్నారు.