అప్పుడే పుట్టిన చిన్నారికి...హెలికాప్టర్ తో గ్రాండ్ వెల్ కం

తమ ఇంట్లో చంటిపిల్లాడు పుడితే ఏదో ఒకటి చేసి తమ సంతోషాన్ని చాటుకొంటాం. కానీ ఇక్కడ కాస్త గ్రాండ్ గా చెప్పుకోవాలి. మహారాష్ట్ర పుణె లోని... షెల్గావ్ గురించి ఇప్పుడు దేశం మొత్తం మాట్లాడుకుంటోంది. ఇందుకు ప్రధాన కారణం కొత్తగా పుట్టిన పసిపాపను ఆ గ్రామానికి హెలికాప్టర్‌లో తీసుకురావడమే. తమకు పాప పుట్టడంతో చాలా ఆనందపడిన ఆ ఫ్యామిలీ... తమ ఇంట్లో అడుగుపెట్టబోయే తొలి పాపకు గ్రాండ్ వెల్‌కమ్ చెప్పాలని అనుకుంది. ఆ పసికందు పేరు రాజ్యలక్ష్మీ. జనవరి 22న తల్లి స్వగ్రామమైన భోసారిలో ఆ చిట్టితల్లి పుట్టింది. "ఖేడ్‌లోని షెల్గావ్‌కి ఆ పాపను తీసుకొచ్చేందుకు.. ఆ ఫ్యామిలీ... ఓ హెలికాప్టర్‌ని అద్దెకు తీసుకున్నాం" అని పాప తండ్రి విశాల్ జరేకార్ గర్వంగా చెప్పారు. విశాల్ జరేకార్.. వృత్తిరీత్యా అడ్వకేట్. హెలికాప్టర్‌కి అద్దె కింద రూ.1 లక్ష చెల్లించారు. "మా కుటుంబం మొత్తంలో ఆడపిల్లలు లేరు. కాబట్టి... పాపను ఘనంగా ఇంటికి ఆహ్వానించాలి అనుకున్నాం. అందుకే రూ.లక్ష ఖర్చైనా పర్లేదు అనుకొని.. హెలికాప్టర్‌లో తీసుకొచ్చాం" అని విశాల్ తెలిపారు. షెల్గావ్‌లో హెలికాప్టర్ దిగేందుకు ఓ పొలం ప్రాంతంలో ప్రత్యేక ఏర్పాటు చేశారు. అక్కడి నుంచి కారులో పాపను ఇంటికి తెచ్చారు.

"చాలా కాలం తర్వాత మా ఫ్యామిలీలో ఆడపిల్ల పుట్టింది. ఇది మాకు అత్యంత ఆనందకర అంశం. అందుకే ఏప్రిల్ 2న నేను, నా భార్య రాజ్యలక్ష్మీ కలిసి... పాపను హెలికాప్టర్‌లో తీసుకొచ్చాం. మేము పాపను హెలికాప్టర్‌లో జెలూరికి తీసుకెళ్లాలి అనుకున్నాం. దైవ ఆశిస్సులు అందించాలి అనుకున్నాం. కానీ అక్కడ హెలికాప్టర్ దింపేందుకు పర్మిషన్ లేదు. అందువల్ల ఆకాశంలోనే ప్రార్థన చేశాం" అని పాప తండ్రి తెలిపారు. ఆ ఫ్యామిలీ తీసుకున్న నిర్ణయాన్ని నెటిజన్లు మెచ్చుకుంటున్నారు. అమ్మాయి పుడితే ఇలా ఘనంగా వెల్‌కం చెప్పడం గొప్ప విషయం అంటున్నారు. "ఓలాక్యాబ్స్ హెలికాప్టర్ సర్వీస్ ప్రారంభించడానికి ఇదే సరైన టైమ్" అని ఓ యూజర్ కామెంట్ ఇచ్చారు. "సంతోషమే గానీ... అలా లక్ష ఖర్చుపెట్టే బదులు.. ఆ డబ్బును ఏ అనాథ శరణాలయానికో ఇచ్చి ఉండాల్సింది. మన దేశంలో చాలా మంది అనాథలున్నారు" అని మరో యూజర్ కామెంట్ ఇచ్చారు. "వాళ్లు ఏదైనా బాలికల ట్రస్టుకి ఆ డబ్బును విరాళంగా ఇచ్చి ఉంటే ఇంకా బాగుండేది" అని మరో యూజర్ స్పందించారు. పాపను ఇంటికి తేవగానే... పూలదండలతో ఆహ్వానించారు. తల్లీ, బిడ్డపై రోజా పూలవర్షం కురిపించారు. ఈ మొత్తం ఘటనను స్థానికులంతా కళ్లారా చూశారు. ఊరు ఊరంతా ఎంతో ఆనందపడింది.