ఎనిమిదో అంతస్తు నుంచి దూకేసింది...కారణమేమిటో తెలుసా

సాయుధుడి కాల్పుల నుంచి తప్పించుకోడానికి ఎనిమిదో అంతస్తు నుంచి కింద దూకిన ఓ మహిళ.. ప్రస్తుతం ఆస్పత్రితో మృత్యువుతో పోరాడుతోంది. దుండగుడు ఆమె కాళ్లు చేతులు కట్టేసినా ఎలాగోలా కిటీకీలో నుంచి కిందికి దూకేయడం గమనార్హం. అమెరికా రాజధాని వాషింగ్టన్ డీసీలో ఏప్రిల్ 21న జరిగిన ఈ ఘటనపై మెట్రోపాలిటన్ పోలీస్ డిపార్ట్‌మెంట్ ట్విటర్‌ ద్వారా వివరాలను తెలియజేసింది. దుండగుడు కాళ్లు కట్టేయడంతో అలాగే భవనంపై నుంచి దూకేసిందని తెలిపింది. ఈ క్రమంలో బాధితురాలికి తీవ్ర గాయాలయ్యాయని పేర్కొంది.

అయితే, తొలుత సాయుధుడి, బాధిత మహిళ మధ్య వివాదం చెలరేగినట్టు పోలీసులు తెలిపారు. ఆమె కాళ్లుచేతులు కట్టేసి, తుపాకీ ఎక్కు పెట్టడంతో కిటికీలో నుంచి ఆమె దూకేసిందని పేర్కొన్నారు. వాయువ్య వాషింగ్టన్‌లోని కనెక్టికట్ అవెన్యూ 4500 బ్లాక్‌లో ఈ ఘటన జరిగినట్టు వివరించారు. ఏప్రిల్ 21 రాత్రి 7 గంటల ప్రాంతంలో ఓ మహిళ భవనంపై నుంచి దూకినట్టు సమాచారం అందడంతో పోలీసులు అక్కడకు చేరుకున్నారు. ఆ ప్రాంతంలో ఓ యువతి తీవ్ర గాయాలతో రక్తపు మడుగులో పడి ఉండటం గుర్తించారు.

తీవ్ర గాయాలతో ఉన్న బాధితురాలిని చికిత్స కోసం ఆస్పత్రిలో చేర్పించారు. యువతి దూకేయడంతో నిందితుడు ఘటనా స్థలం నుంచి పరారయ్యాడని పోలీసులు తెలిపారు. మహిళ దూకేసిన ఇంటిలో పోలీసులు తనిఖీలు నిర్వహించగా.. లైసెన్స్ లేని ఓ తుపాకీ లభ్యమయ్యిందని, దానితోనే యువతిని హత్య చేయడానికి సిద్ధమయ్యాడని చెప్పారు. నిందితుడ్ని కైలీ జమాల్ పల్మేర్‌గా గుర్తించిన పోలీసులు.. ఆ మర్నాడు అదుపులోకి తీసుకున్నారు. లైసెన్స్ లేని ఆ తుపాకీలో బుల్లెట్లను లోడ్ చేసి ఉంచినట్టు గుర్తించారు.

ఇటీవల సంవత్సరాల్లో అమెరికాలో అనధికారికంగా తయారుచేసిన తుపాకుల వాడకం భారీగా పెరిగింది. ప్రయివేట్‌గా తయారైన వీటీకి లైసెన్స్‌లు ఉండవు. ఇటువంటి తుపాకులను అమెరికాలో ఘోస్ట్ గన్స్‌గా వ్యవహరిస్తారు. అమెరికాలో రోజూ ఏదో ఒకచోట దుండగులు కాల్పులు తెగబడుతున్నారు. హింసాత్మక ఘటనకు కారణమవుతున్న అక్రమ తుపాకులను ఉక్కుపాదంతో అణచివేస్తామని అమెరికా అధ్యక్షుడు జో బైడెన్ గతవారం ప్రతిజ్ఞ చేశారు. గతేడాది 20వేల అక్రమ తుపాకులను అధికారులు స్వాధీనం చేసుకున్నారు. 2016తో పోల్చితే పదిరెట్లు ఎక్కువ కావడం గమనార్హం.