ఇంటితోపాటు నా మాజీ భర్త కూడా ఫ్రీ: ఓ మహిళ వింత ప్రకటన

వాస్తవానికి ఏదైనా ఆఫర్లను మనం షాపింగ్ మాల్స్ లో వింటుంటాం.  కానీ సాంకేతికత పెరిగాక ఆఫర్లు ఎపుడు ఎక్కడినుంచి వస్తాయో చెప్పడం కష్టంగా మారింది. అమెరికాకు చెందిన ఒక మహిళ తన మాజీ భర్తతో సహా ఇంటిని అమ్మకానికి పెట్టింది. పైగా ఆ మాజీ భర్త ఇల్లు శుభ్రంగా ఉంచుతాడని, వంటలో సాయం చేస్తాడని కూడా చెప్పుకొచ్చింది. ఫ్లోరిడాకు చెందిన క్రిస్టల్ బాల్ (43), రిచర్డ్ చౌలో (54)లు ఏడేళ్ల తర్వాత ఇటీవలె విడాకులు తీసుకున్నారు. విడిపోయిన తర్వాత వారు బిడ్డల పట్ల, వ్యాపారాలను చూసుకోవడం విషయంలో కొన్ని నిబంధనలు పెట్టుకున్నారు.

ఈ మేరకు క్రిస్టల్ బాల్ తన పనామా సిటీ బీచ్‌ దగ్గరున్న ఇంటిని విక్రయించాలని నిర్ణయించుకుంది. ఇందులో భాగంగా తన మాజీ భర్త రిచర్డ్‌తో పాటు మూడు బెడ్‌ రూమ్‌లు, రెండు బాత్‌రూమ్‌లున్న ఇంటిని, ఇతర వస్తువులను సేల్‌‌కు పెడుతున్నట్టు ఓ ఆన్‌లైన్ సైట్‌లో ప్రకటన ఇచ్చింది. ఇంటిని కొనుగోలు చేసిన వాళ్లు రిచర్డ్‌ను ఉండేందుకు అనుమతిస్తే డిస్కౌంట్ కూడా ఇస్తానని ప్రకటనలో తెలియజేసింది.

ఎవరు కొన్నా ఆ ఇంట్లో రిచర్డ్ ఉండాలనే నిబంధనతోనే క్రిస్టల్ బాల్ ఇంటిని సేల్ చేయడానికి పెట్టింది.(wonderfully rehabbed husband) ఆ విషయాన్ని ప్రకటనలో క్లియర్‌గా మెన్షన్ చేసింది. ఇంటితో పాటు, రిచర్డ్‌ ఫోటోలను కూడా జత చేసి ప్రకటన కూడా ఇచ్చింది. పైగా ఆ ప్రకటనలో రిచర్డ్ వంటలో, ఇంటి క్లీనింగ్‌, రిపేర్లు చేయడంలో బాగా సహాయం చేస్తాడని కూడా పేర్కొంది.

అయితే నిబంధనలకు విరుద్ధంగా ఉందని చాలాసార్లు ఇంటి ప్రకటనను వెబ్‌సైట్ లిస్టింగ్ ఏజెంట్లు తొలగించారు. కానీ అద్దెకుండేవారితో ఇళ్లను అమ్మడం రాష్ట్రంలో సాధారణమైన పద్ధతి అని క్రిస్టల్ బాల్ అంటోంది. పైగా ఇంటిని, రిచర్డ్‌ను త్వరగా తన చేతుల్లోంచి తీసుకుంటారనే ఆశాభావంతో ఉంది. ఇదిలావుంటే ఆ ఇంటి ధర మార్కెట్‌లో రూ.5.35 కోట్లు ఉంది.

ఇదిలావుంటే గతంలో న్యూజిలాండ్‌లో ఓ మహిళ తన భర్తను వేలానికి పెట్టింది. లిండా మెక్ అలిస్టర్ అనే మహిళ తన భర్తను ట్రేడ్ మీ అనే వెబ్‌సైట్‌‌లో వేలానికి పెట్టింది. తన భర్త గుణగణాలను కూడా వివరించింది. కుటుంబం కంటే ఎక్కువగా బీరును ప్రేమిస్తాడని వెల్లడించింది. తనను, తన పిల్లలను వదిలేసి ఫిషింగ్‌కు వెళ్లడంతో కోపంతో లిండా ఈ పని చేసింది. అయితే ఆయన్ని కొనడానికి చాలామంది మహిళలు ఎగబడ్డారు. పైగా గ్యారంటీ ఉందా..? అంటూ కామెంట్లు పెట్టారు.