క్రిప్టో కరెన్సీ విలువ...భారీగా పతనం

క్రిప్టో కరెన్సీ మాయలో పడి ఎందరో ఎంతో  నష్టపోతున్నారు. తాజాగా క్రిప్టో కరెన్సీ వాల్యూ భారీగా తగ్గిపోయింది. నెల వ్యవధిలోనే క్రిప్టో కరెన్సీల మార్కెట్ వాల్యు సుమారు 800 బిలియన్ డాలర్లు(రూ. 61,76,928 కోట్లు) ఆవిరైపోయాయి. కాయిన్‌మార్కెట్‌క్యాప్‌లో ఈ విషయం వెల్లడైంది. ప్రపంచవ్యాప్తంగా మానిటరీ పాలసీలు కఠినతరం చేయడంతో పాటు, క్రిప్టోలపై నియంత్రణలు తీసుకొస్తుండటంతో ఈ రిస్క్ అసెట్స్ వాల్యు హరించుకుపోతుంది. బిట్ కాయిన్ వాల్యు అయితే 10 నెలల కనిష్టాన్ని తాకింది. ఆ తర్వాత కొద్దిగా కోలుకుని ఈ కరెన్సీ 31,450 వద్ద ట్రేడైంది. నవంబర్ నెలలో ఈ కాయిన్ ఆల్ టైమ్ గరిష్ట స్థాయి 69 వేల డాలర్ల మార్కుని తాకింది. ఆ గరిష్ట స్థాయిలతో పోల్చుకుంటే బిట్ కాయిన్ వాల్యు 54 శాతానికి పైగా తగ్గిపోయింది.

ద్రవ్యోల్బణం పెరుగుతుండటంతో ప్రపంచవ్యాప్తంగా సెంట్రల్ బ్యాంకులు వడ్డీ రేట్లను పెంచుతూ మానిటరీ పాలసీని కఠినతరం చేస్తున్నాయి. దీంతో ఈక్విటీలు కుప్పకూలుతున్నాయి. ఈక్విటీలతో పాటు డిజిటల్ ఆస్తుల ధరలు తగ్గిపోతున్నాయి. నవంబర్ 2021లో రికార్డు స్థాయిలను తాకిన టెక్ హెవీ ఇండెక్స్ నాస్‌డాక్ కూడా 28 శాతానికి పైగా పడిపోయింది. ధరలు భారీగా క్రాష్ అయిన ఈ సమయంలో డిజిటల్ ఆస్తుల ప్రొడక్టులను లేదా క్రిప్టో ఫండ్‌లను కొనేందుకు కొందరు ఇన్వెస్టర్లు చూస్తున్నారు. దీంతో గత వారం క్రిప్టో మార్కెట్లోకి 40 మిలియన్ డాలర్ల ఇన్‌ఫ్లోస్ వచ్చినట్టు తెలిసింది.

మరోవైపు దేశీయంగా క్రిప్టో అసెట్స్‌పై ఆదాయపు పన్ను శాఖ తన నిఘాను పెంచింది. భారత్ వెలుపల వీటి లావాదేవీలు ఎక్కువగా జరుగుతూ పన్నులు తప్పించుకుంటూ ఉండటంతో.. వీటిపై మరింత నిఘా పెంచాలని ఆదాయపు పన్ను శాఖ నిర్ణయించినట్టు తెలిసింది. దేశీయ మార్కెట్లో ఈ క్రిప్టో ఇన్వెస్ట్‌మెంట్లపై కఠిన నిబంధనలను, పన్నులను తీసుకొస్తుండటంతో హవాలా ఛానల్స్ ద్వారా వీటిని బయట దేశాలకు తరలించి, అక్కడ పెట్టుబడులు పెడుతున్నారు.