షవర్మా పాశ్చాత్య దేశ ఆహారం..అది మన వాతావరణానికి అనుకూలం కాదు

షవర్మా పాశ్చాత్య దేశ ఆహారమని, అది మన దేశ వాతావరణానికి ఏ మాత్రం అనుకూలంకాదని తమిళనాడు ఆరోగ్యశాఖ మంత్రి సుబ్రమణియన్ వెల్లడించారు. తమిళనాడులో షవర్మా భయం పట్టుకుంది. పిల్లలు, టీనేజర్లు షవర్మాని ఎంతో ఇష్టంగా తింటుంటారు. అలాంటి షవర్మా‌పై వెల్లూరు జిల్లాలోని గుడియాథం మున్సిపాలిటీలో నిషేధం విధించారు. మున్సిపల్ కౌన్సిల్ సభ్యులందరినీ సమావేశపరిచి.. షవర్మాపై బ్యాన్ చేయాలని నిర్ణయం తీసుకున్నారు. తమ మున్సిపాలిటీ పరిధిలో షవర్మాని నిషేధిస్తున్నట్టు మేయర్ సౌందరరాజన్ తెలిపారు. షవర్మా తినడం వల్ల ఆరోగ్యపరమైన సమస్యలు తలెత్తుతున్నాయనే కారణంతో ఈ నిర్ణయం తీసుకున్నట్టు ఆయన వెల్లడించారు.

అంతకుముందు ఆరోగ్యశాఖ మంత్రి సుబ్రమణియన్ షవర్మాను తినొద్దని సూచించారు. షవర్మా భారతీయ వంటకాల్లో భాగంగా కాదని, అది పశ్చిమ దేశాల ఆహారమని ఆయన అన్నారు. ఇతర ఆహార పదార్థాలు అందుబాటులో ఉన్నాయని, ప్రజలు తమ ఆరోగ్యాన్ని ప్రభావితం చేసే వాటిని తినకూడదని ఆయన చెప్పారు.

"షవర్మా పాశ్చాత్య దేశ ఆహారం. ఆ దేశాల వాతావరణ పరిస్థితుల కారణంగా షవర్మా వారికి అనుకూలంగా ఉంటుంది. ఆ ప్రాంతాల్లో ఉష్ణోగ్రత మైనస్ డిగ్రీలకు వెళ్లే అవకాశం ఉంది. బయట ఉంచినా చెడిపోదు. మాంసాహారం ఏదైనా కావచ్చు, ఫ్రీజర్‌లో సరైన స్థితిలో ఉంచకపోతే, అవి పాడైపోతాయి. మన దేశంలో వాతావరణ పరిస్థితులు వేరు. చెడిపోయిన వస్తువులను తినడం వల్ల తీవ్రమైన ఆరోగ్య సమస్యలు వస్తాయి." అని మంత్రి సుబ్రమణియన్ చెప్పారు. అయితే షవర్మా పశ్చిమాసియాకు చెందిన ఆహారం.

నిజానికి కేరళలో షవర్మా తిని 16 ఏళ్ల బాలిక చనిపోయింది. మరో 18 మంది విద్యార్థులు తీవ్ర అస్వస్థతకు గురై ఆస్పత్రిలో చికిత్స పొందుతున్నారు. ఓ జ్యూస్ షాపులో షవర్మా తిన్న తర్వాత వీరంతా అనారోగ్యానికి గురయ్యారు. దాంతో అధికారులు ఆ షాపు యజమానిపై కేసు పెట్టారు. ఈ నేపథ్యంలో షవర్మాపై తమిళనాడు రాష్ట్రం అప్రమత్తమైంది. కాగా షవర్మాని అత్యధిక ఉష్ణోగ్రతలుండే మన దేశంలో సరైన విధంగా నిల్వ చేయకపోతే అనారోగ్య సమస్యల తలెత్తుతాయని వైద్య నిపుణులు అంటున్నారు.