చిల్లకొట్టుడు...ఒకే సారి ముగ్గురిని పెళ్లాడాడు

ఒక భార్యతోనే సతమతమవున్న ఈ రోజుల్లో ఏకంగా ముగ్గురితో సహజీవనం చేసి వారందరితో ఒకే ఇంట్లో నివసించడమే కాదు ఇపుడు ఒకే మండపంలో ఆ ముగ్గురు మహిళలను పెళ్లాడాడు ఓ వ్యక్తి. సినిమా ఘటనను తలపించేలా ఉన్న ఈ చిలకొట్టుడి కథ ఓ సారి తెలుసుకొందాం. ఒకే మండపంలో ముగ్గురు మహిళలను పెళ్లి చేసుకున్నాడు 42 ఏళ్ల ఓ వ్యక్తి. కొన్నేళ్లుగా వారితో అతడు సహజీవనం చేస్తున్నాడు. ఆ ముగ్గురు మహిళల ద్వారా కలిగిన ముగ్గురు కుమారులు, ముగ్గురు కుమార్తెలు ఈ పెళ్లిలో ప్రత్యేక ఆకర్షణగా నిలిచారు. మధ్యప్రదేశ్‌లోని అలిరాజ్‌పూర్ జిల్లాలో చోటుచేసుకున్న ఈ ఘటన చర్చనీయాంశంగా మారింది. ముగ్గురు మహిళల్ని ఒకేసారి పెళ్లి చేసుకుంటున్నట్లు వేసిన శుభలేఖతో పాటు పెళ్లి వేడుకకు సంబంధించిన ఫొటోలు సోషల్ మీడియాలో వైరల్ అవుతున్నాయి. అలిరాజ్‌పూర్ జిల్లా నాన్పూర్ గ్రామ పంచాయతీ పరిధిలోని మోరి ఫలియా గ్రామంలో గిరిజన సంప్రదాయంలో ఈ పెళ్లి జరిగింది.

మోరిఫలియా గ్రామానికి చెందిన సమ్రాత్ మౌర్య 15 ఏళ్ల కిందట ఓ మహిళను తీసుకొని పారిపోయాడు. కొంతకాలం పాటు ఆమెతో కలిసి సహజీవనం చేసిన అతడు.. ఆ తర్వాత స్వగ్రామానికి వచ్చి కాపురం పెట్టాడు. పదేళ్ల కిందట మరో మహిళతో మౌర్యకి ఏర్పడిన పరిచయం సహజీవనానికి దారి తీసింది. నాలుగేళ్ల కిందట మరో మహిళ మౌర్యని ఇష్టపడి అతడి వద్దకు వచ్చేసింది. మౌర్య ఈ ముగ్గురు మహిళతో ఒకే ఇంట్లో సహజీవనం చేస్తున్నాడు. వారి ద్వారా ఆరుగురిని సంతానంగా పొందాడు. ఈ ముగ్గురు మహిళల్లో ఒకరు స్థానిక పాఠశాలలో ప్యూన్‌గా పనిచేస్తుండగా.. మిగిలిన ఇద్దరు వ్యవసాయ పనులు, కుటుంబ వ్యవహారాలు చూసుకుంటున్నారు.

‘ముగ్గురు మహిళలతో సహజీవనం ప్రారంభమైనప్పుడు నేను ఆర్థికంగా బాగా లేను. ఈ మూడు సంబంధాల నుంచి పిల్లలు ఉన్నప్పటికీ ఈ రిలేషన్‌ను వివాహ బంధంగా మార్చుకోలేకపోయాను. కానీ, ఇప్పుడు మేము మా బంధాన్ని వివాహ బంధంగా మార్చుకోవాల్సిన సమయం వచ్చింది. ఇది చాలా అవసరం కూడా. అది మాత్రమే మన కుటుంబ వ్యవస్థలోని అన్ని పవిత్రమైన ఆచారాల్లో భాగం కావడానికి అర్హతను కలిగిస్తుంది. అలాగే మా కుల దేవత ఆలయంలోకి ప్రవేశాన్ని కూడా కల్పిస్తుంది’ అని మౌర్య చెప్పాడు.

ఒకరి తర్వాత ఒకరు ముగ్గురి మెడలో తాళి కట్టిన మౌర్య.. పెళ్లి తర్వాత నిర్వహించే బిదాయ్ కార్యక్రమానికి వారిని తీసుకెళ్లాడు. పెళ్లి వేడుకలో స్థానిక గిరిజనులతో కలిసి ఈ నలుగురూ సంప్రదాయ నృత్యం చేస్తూ ఆహ్లాదంగా గడిపారు. సంప్రదాయ వాయిద్యాలకు మౌర్య సంతానం కూడా నృత్యం చేస్తూ ఎంజాయ్ చేశారు. ‘మా నాన్న పెళ్లి వేడుక చూస్తుంటే మాకు స్వర్గంలో ఉన్నట్టుగా ఉంది. చాలా బాగా ఎంజాయ్ చేస్తున్నాం’ అని సునీత అంది. ఆరుగురు సంతానంలో సునీతే పెద్ద.

భిలాలా సంప్రదాయం ప్రకారం వాళ్లు పెళ్లి చేసుకోవడం తప్పనిసరి అని ఆ గిరిజన తెగకు చెందిన పెద్దలు ప్రకాశ్ మౌర్య, సజ్జన్ సింగ్ మౌర్య అన్నారు. అలాగైతేనే వాళ్లు తమ ఆచారాలు నిర్వహించేందుకు అర్హత సాధిస్తారని తెలిపారు. ‘వారి బంధాన్ని వివాహ బంధంగా మార్చుకోకపోతే.. తమ పిల్లల పెళ్లి చేసేందుకు కూడా వారికి అర్హత ఉండదు’ అని వారు పేర్కొన్నారు.

అలిరాజ్‌పూర్ జిల్లాలోని భిలాలా తెగ సంప్రదాయాల ప్రకారం.. సహజీవనం చేయడాన్ని ‘లుగుడి-లాడ’ అని పిలుస్తారు. ఈ తెగలో ఈ బంధాన్ని కూడా పవిత్రంగానే భావిస్తారు. ఒకే మండపంలో మూడు లివ్-ఇన్ రిలేషన్లను ఒక్కొక్కటిగా వివాహం చేసుకోవడాన్ని కూడా వీరు చట్టవిరుద్ధంగా పరిగణించరు. నాన్పూర్ గ్రామ పంచాయతీకి మౌర్య గతంలో సర్పంచ్‌గా పని చేయడం విశేషం.