బెంగాల్ లో నాటు బాంబుల కలకలం...ఏదైనా భారీ కుట్ర దాగుందా

పశ్చిమ బెంగాల్ రాష్ట్రంలో కలకలం రేగుతోంది. కారణం ఆ రాష్ట్రంలో పెద్ద ఎత్తున్న బాంబులు వెలుగులోకి రావడమే. అక్కడి అటవీ ప్రాంతంలో పెద్దఎత్తున బాంబులు బయటపడ్డాయి. తూర్పు మేదినీపూర్ జిల్లాలో బక్చాలోని హోగ్లా అటవీ ప్రాంతంలో శనివారం పలు నాటు బాంబులు కనిపించాయి. ప్లాస్టిక్ డబ్బాల్లో బాంబులను గుర్తించారు. ఈ సమాచారం అందుకున్న పోలీసులు, బాంబ్ డిస్పోజల్ స్క్వాడ్ ఘటనా స్థలానికి చేరుకుని బాంబులను స్వాధీనం చేసుకున్నారు.

"భారీగా బాంబులు స్వాధీనం చేసుకున్నాం. దీనిపై కూంబింగ్ ఆపరేషన్ ఇంకా కొనసాగుతోంది. హోగ్లా అటవీ ప్రాంతంలో దొరికిన బాంబులను నిర్వీర్యం చేసే ప్రక్రియను మొదలుపెట్టాం." అని పశ్చిమ బెంగాల్ పోలీసులు తెలిపారు. ఇప్పటికే బాంబ్ డిస్పోజల్ స్క్వాడ్ బాంబులను దూరంగా తీసుకెళ్లి నిర్వీర్యం చేసింది. నిర్మానుష్య ప్రాంతాలకు తీసుకెళ్లి ధ్వంసం చేసింది. ఇదిలావుంటే ముర్షిదాబాద్ జిల్లాలో 22 నాటు బాంబులు దొరికిన ఒక రోజు తర్వాత మళ్లీ బాంబు కనిపించడం అక్కడ కలకలం రేపుతుంది. అయితే ఇంతకు ముందు కూడా అక్కడ అనేక బాంబులు బయటపడ్డాయి. దీంతో మార్చి నెలలో ముఖ్యమంత్రి మమతా బెనర్జీ జిల్లాలు, అన్ని పోలీసు స్టేషన్ పరిధిలో బాంబులు, పేలుడు పదార్థాలను స్వాధీనం చేసుకోవడానికి, వాటిని స్వాధీనం చేసుకోవడానికి పదిరోజుల ప్రత్యేక డ్రైవ్‌ను ప్రారంభించాలని ఆదేశించారు. తృణమూల్ కాంగ్రెస్ నాయకుడు బదు షేక్ మరణం, తర్వాత బీర్భూమ్ హింస నేపథ్యంలో సీఎం ఈ ఆదేశాలు జారీ చేశారు.

గత మార్చి 21న రాత్రి బీర్భూమ్‌ జిల్లాలోని రామ్‌పూర్ హాట్‌లో గుర్తు తెలియని వ్యక్తులు పది ఇళ్లకు నిప్పు పెట్టారు. ఈ ఘటనలో ఎనిమిది మందికి ప్రాణాలు కోల్పోయారు. చనిపోయిన వారిలో పిల్లలు, మహిళలు కూడా ఉన్నారు. ఈ దారుణమైన హింస తర్వాత అక్కడున్న గ్రామస్థులు ఊరు వదిలి వెళ్లిపోయారు. దీనిపై అక్కడ పెద్దస్థాయిలో విమర్శలు వెల్లువెత్తాయి.