రికరింగ్ డిపాజిట్లపై వడ్డీ రేట్ల పెంపు....హెచ్‌డీఎఫ్‌సీ నిర్ణయం

హెచ్‌డీఎఫ్‌సీ బ్యాంక్ లోని డిపాజిటర్లకు శుభవార్త అందించింది. ప్రైవేట్ రంగ దిగ్గజ బ్యాంక్ అయిన హెచ్‌డీఎఫ్‌సీ తాజాగా రికరింగ్ డిపాజిట్లపై వడ్డీ రేట్లు పెంచుతూ నిర్ణయం తీసుకుంది. మే 17 నుంచి వడ్డీ రేట్ల పెంపు నిర్ణయం అమలులోకి వచ్చింది. 27 నుంచి 120 నెలల కాల పరిమితిలోని రికరింగ్ డిపాజిట్లకు వడ్డీ రేట్ల పెంపు వర్తిస్తుంది. బ్యాంక్ ఆరు నెలల ఆర్‌డీలపై 3.5 శాతం వడ్డీ రేటును అందిస్తోంది. అలాగే 9 నెలల రికరింగ్ డిపాజిట్లపై వడ్డీ రేటు 4.4 శాతంగా కొనసాగుతోంది. 12 నెలల నుంచి 24 నెలల కాల పరిమితిలోని రికరింగ్ డిపాజిట్లపై వడ్డీ రేట్లు 5.1 శాతంగానే ఉంది. హెచ్‌డీఎఫ్‌సీ బ్యాంక్ గతంలో 27 నెలల నుంచి 36 నెలల కాల పరిమితిలోని ఆర్‌డీలపై 5.2 శాతం వడ్డీని అందించేది. కానీ ఇప్పుడు వడ్డీ రేటు 5.4 శాతానికి చేరింది. అంటే వడ్డీ రేటు 20 బేసిస్ పాయింట్ల మేర పెరిగిందని చెప్పుకోవచ్చు.

హెచ్‌డీఎఫ్‌సీ బ్యాంక్ గతంలో 39 నెలల నుంచి 60 నెలల కాల పరిమితిలోని రికరింగ్ డిపాజిట్లపై 5.45 శాతం వడ్డీ రేటును ఆఫర్ చేసేది. అయితే ఇప్పుడు ఈ వడ్డీ రేటు 5.6 శాతానికి చేరింది. అంటే వడ్డీ రేటు 15 బేసిస్ పాయింట్లకు ఎగసింది. అలాగే 90 నెలల నుంచి 120 నెలల టెన్యూర్‌లోని రికరింగ్ డిపాజిట్లపై గతంలో 5.6 శాతం వడ్డీ వచ్చేది. అయితే ఇప్పుడు 5.75 శాతం వడ్డీని సొంతం చేసుకోవచ్చు. అంటే వడ్డీ రేటులో 15 బేసిస్ పాయింట్ల మేర పెరుగుదల నమోదు అయ్యింది.

సీనియర్ సిటిజన్స్ అదనంగా 0.5 శాతం అధిక వడ్డీని పొందొచ్చు. 6 నెలల నుంచి 60 నెలల రికరింగ్ డిపాజిట్లకు ఇది వర్తిస్తుంది. ఐదేళ్లకు పైగా, పదేళ్లలోపు రికరిండ్ డిపాజిట్లపై అయితే 0.25 శాతం అదనపు వడ్డీ వస్తుంది. ఇది 0.5 శాతం రెగ్యులర్ అధిక వడ్డీకి అదనం అని చెప్పుకోవాలి. ఈ ఫెసిలిటీ సెప్టెంబర్ 30 వరకు మాత్రమే అందుబాటులో ఉంటుంది. ఫిక్స్‌డ్ డిపాజిట్లకు కూడా ఇదే వర్తిస్తుంది. కొత్తగా ఎఫ్‌డీ (FD) ఓపెన్ చేసే వారు, లేదంటే రెన్యూవల్ చేసుకునే వారికి ఈ ప్రయోజనం అందుబాటులో ఉంటుంది. ఇకపోతే 90 నెలల నుంచి 120 నెలల రికరింగ్ డిపాజిట్లపై 6.5 శాతం వడ్డీ వస్తోంది.