డాక్టర్ల నిర్లక్ష్యంతో నలుగురు చిన్నారులకు హెచ్ఐవీ

ఏదైనా అనారోగ్యంతో బాధపడేవారికి డాక్టర్లను దేవుళ్లుగా కొలుస్తుంటుంటారు. అయితే కొందరు డాక్టర్ల నిర్లక్ష్యంతో ఘోరం జరిగింది. అభంశుభం తెలియని పసివారికి హెచ్ఐవీ సోకింది. వారిలో ఒకరు చనిపోవడం అందరినీ కన్నీళ్లు పెట్టిస్తోంది. మరో ముగ్గురు ప్రస్తుతం చావుబతుకుల్లో కొట్టుమిట్టాడుతున్నారు. ఈ విషాదకర ఘటనకు సంబంధించిన వివరాలిలా ఉన్నాయి.

మహారాష్ట్రంలోని నాగ్‌పూర్‌లో తలసేమియాతో బాధపడుతున్న నలుగురు చిన్నారులను వారి తల్లిదండ్రులు ఓ ఆసుపత్రిలో చికిత్స చేయిస్తున్నారు. ఈ వ్యాధితో బాధపడే వారికి తరచూ రక్తమార్పిడి చేయాల్సి ఉంటుంది. చికిత్సలో భాగంగా కొంత కాలం క్రితం అనుకోకుండా ఆ చిన్నారులకు హెచ్ఐవీ పాజిటివ్ రక్తాన్ని వైద్యులు ఎక్కించారు. దీంతో నలుగురు చిన్నారులకు హెఐవీ వ్యాపించింది. అందులో ఒకరు మృతి చెందగా, ముగ్గురు ప్రాణాపాయ పరిస్థితుల్లో చికిత్స పొందుతున్నారు. ఈ ఘటన స్థానికంగా సంచలనం కాగా ఆ రాష్ట్ర వైద్యారోగ్య మంత్రి రాజేష్‌ తోపే స్పందించారు. 

ఈ అంశంపై పూర్తి స్థాయిలో విచారణ జరిపి, వాస్తవాలను తెలియజేయాలని అధికారులను ఆదేశించారు. రాష్ట్ర ఆరోగ్య శాఖ అసిస్టెంట్‌ డిప్యూటీ డైరెక్టర్‌ డాక్టర్‌ ఆర్కే ధాకటే స్పందిస్తూ చిన్నారులకు హెచ్ఐవీ సోకిన విషయాన్ని ధ్రువీకరించారు. తలసేమియాతో బాధపడుతున్న ఆ చిన్నారులకు సమీపంలోని బ్లడ్ బ్యాంకు నుంచి రక్తం రప్పించి, ఎక్కిస్తున్నారని చెప్పారు. అయితే అందులో హెచ్ఐవీ సోకిన రక్తం కావడంతో చిన్నారులకు కూడా హెచ్ఐవీ వచ్చిందన్నారు. దీనిపై పూర్తి స్థాయి దర్యాప్తు చేస్తున్నామని మీడియాకు వివరించారు.