సీఐ రంగ ప్రవేశంతో..శ్రావణి కథ సుఖాంతం

ఉపాధి కోసం గల్ప్  దేశాలకు వెళ్లి ఇబ్బందులు  పడుతున్న వారు ఎందరో ఉన్నారు. ఏజెంట్ల మోసాలకు గురవుతున్నవారు ఉన్నారు. తాజాగా ఓ ఏజెంట్ మోసానికి గురైన  శ్రావణి ఎట్టకేలకు  పోలీసుల రంగ ప్రవేశంతో కథ సుఖాంతమైంది. భాక్రాపేట సీఐ తులసీరాంం ప్రత్యేక చోరవతో  ఆ మహిళకు న్యాయం జరిగింది. కువైట్‌లో ఏజెంట్‌ చెరలో చిత్రహింసలకు గురవుతున్న తిరుపతి జిల్లాకు చెందిన శ్రావణికి సీఐ తులసీరాం చొరవతో ఎట్టకేలకు విముక్తి లభించింది. శ్రావణిని స్వదేశానికి తీసుకొచ్చేందుకు అన్నీ ఏర్పాట్లు పూర్తి చేశారు. గురువారం రాత్రికి చెన్నై విమానాశ్రయానికి చేరుకోనున్నారు. సీఐ తులసీరాం ఏజెంట్‌తో మాట్లాడి శ్రావణి స్వదేశానికి వచ్చేందుకు అతడి ద్వారానే ఏర్పాటు చేయించారు.

తిరుపతి జిల్లా ఎర్రావారిపాలెం మండలం బోడేవాండ్లపల్లె పంచాయతీకి చెందిన శ్రావణి (26) ఈ నెల 24న ఉపాధి నిమిత్తం కువైట్‌కు వెళ్లారు. అయితే, ఏజెంట్ చెంగల్‌రాజు తనను గదిలో నిర్బంధించి చిత్రహింసలు పెడుతున్నారంటూ బాధితురాలు వాపోయారు. తనను ఇక్కడి విడిపించేలా చూడాలంటూ వేడుకున్నారు. ఈ మేరకు శ్రావణి సెల్ఫీ వీడియోను కుటుంబ సభ్యులకు పంపడంతో ఈ విషయం వెలుగులోకి వచ్చింది. ఈ క్రమంలో బాధితురాలి భర్త, కుటుంబ సభ్యులు పోలీసు స్టేషన్‌కు వెళ్లి ఫిర్యాదు చేయడంతో భాక్రాపేట సీఐ తులసీరాం స్పందించారు. బాధితురాలితో పాటు ఆమెను కువైట్ తీసుకెళ్లిన ఏజెంటు చెంగల్‌రాజుతో సీఐ ఫోన్లో మాట్లాడారు. బాధితురాలు స్వదేశానికి వచ్చేందుకు ఏజెంటు ద్వారానే ఏర్పాట్లు చేయించారు.

అలాగే, కువైట్ ఎంబసీ అధికారులతో కూడా తులసీరామ్ మాట్లాడారు. దీంతో ఏజెంట్ భారత్‌కు తిరుగు ప్రయాణం టికెట్ బుక్ చేశారు. బుధవారం అర్ధరాత్రి కువైట్ నుంచి బయల్దేరి గురువారం ఉదయం 8.25 గంటలకు అహ్మదాబాద్‌కు చేరుకుంటారు. అలాగే, గురువారం రాత్రి 10 గంటలకు అహ్మదాబాద్ నుంచి బయల్దేరి రాత్రి 12.10 గంటలకు చెన్నైకి చేరుకుంటారు. ఈ సందర్భంగా శ్రావణి మాట్లాడుతూ.. ఏజెంట్ చెంగల్‌రాజు మాత్రమే తనను ఇబ్బంది పెట్టాడని.. మిగిలిన వాళ్లు బాగానే సహకరించారని తెలిపారు. తనకు సహకరించిన భాక్రపేట సీఐ తులసీరాంకు ధన్యవాదాలు తెలిపారు.