ఒక్క ఏఫ్రిల్ నెలలో...16.6లక్షల అకౌంట్లపై బ్యాన్ చేసిన వాట్సాప్

సోషల్ మీడియా వేదిక మంచి ఉద్దేశం కోసం వాడుకోవాలి. అలాకాకుండా దురుద్దేశంతో వాడితే వేటు తప్పదు మరి. ఇదిలావుంటే మెసేజింగ్ ప్లాట్‌ఫామ్ వాట్సాప్‌ మరోసారి కొరడా ఝుళిపించింది. నిబంధనలు అతిక్రమించిన అకౌంట్లపై చర్యలు తీసుకుంది. ఐటీ రూల్స్ 2021 ప్రకారం నెలవారి రిపోర్ట్‌ను వాట్సాప్‌ వెల్లడించింది. యూజర్ సేఫ్టీ మంత్లీ రిపోర్ట్‌లో ఈ వివరాలను పేర్కొంది. వాట్సాప్ నియమ నిబంధనలు, భారత చట్టాలను అతిక్రమించిన కారణంగా ఏప్రిల్‌ నెలలో 16.6లక్షల అకౌంట్లపై బ్యాన్ విధించినట్టు వాట్సాప్‌ ప్రకటించింది. అలాగే వాట్సాప్‌ మెకానిజమ్ ద్వారా యూజర్లు ఇచ్చిన ఫిర్యాదుల మేరకు కూడా చర్యలు తీసుకున్నట్టు తెలిపింది.

రూల్ 4(1)(డీ) ఇన్ఫర్మేషన్ టెక్నాలజీ రూల్స్ 2021 కింద ఏప్రిల్ నెల నివేదికను వాట్సాప్‌ ప్రకటించింది. బ్యాన్ చేసిన అకౌంట్లతో పాటు వచ్చిన ఫిర్యాదుల వివరాలను పొందుపరిచింది. ఏప్రిల్ 1 నుంచి ఏప్రిల్ 30 మధ్య తీసుకున్న చర్యలను వివరించింది. ఏప్రిల్‍లో మొత్తంగా యూజర్ల నుంచి 844 ఫిర్యాదులు అందాయని వాట్సాప్‌ పేర్కొంది. అందులో 90 అకౌంట్ సపోర్ట్‌కు సంబంధించినవి కాగా, 670 బ్యాన్ కోసం అప్పీల్ చేసినవి. మరో 34 ప్రొడక్ట్ సపోర్ట్ గురించి వచ్చాయి. ఇందులో 123 అభ్యర్థనలపై వాట్సాప్‌ చర్యలు తీసుకుంది. ఇవన్నీ బ్యాన్ కేటగిరీకి చెందినవేనని పేర్కొంది.

ఏవైన అకౌంట్‌పై అభ్యంతరాలు ఉంటే యూజర్లు వాట్సాప్‌కు ఫిర్యాదు చేయవచ్చు. grievance_officer_wa@support.whatsapp.com కు మెయిల్ చేయవచ్చు. లేకపోతే భారత వాట్సాప్‌ గ్రీవెన్స్ అధికారికి పోస్ట్ కూడా పంపవచ్చు. అభ్యంతరకరమైన, హానికరమైన కంటెంట్‌ను నిలిపివేసేలా వాట్సాప్‌ కూడా చాలా టూల్స్ వినియోగిస్తోంది. నిబంధనలకు విరుద్ధంగా ఇలాంటి కంటెంట్ షేర్ చేస్తున్న అకౌంట్లపై చర్యలు తీసుకుంటోంది.

“అభ్యంతరకర కంటెంట్‌ను సమర్థంగా నిరోధిస్తున్నాం. ఈ విషయంలో ఎండ్ టూ ఎండ్ ఎన్‌క్రిప్టెడ్ మెసేజ్‌ సర్వీస్‌‌లో మార్కెట్‌ లీడర్‌గా కొనసాగుతున్నాం. అభ్యంతకర కంటెంట్‌ను కట్టడి చేసేందుకు ఇంజినీర్లు, డేటా సైంటిస్టులు, అనలిస్టులు, రీసెర్చర్స్, లా ఎన్‌ఫోర్స్‌మెంట్ నిపుణులు, ఆన్‌లైన్ సేఫ్టీ బృందాలు పని చేస్తున్నాయి” అని వాట్సాప్‌ ప్రతినిధి ఆ నివేదికలో పేర్కొన్నారు.

ఐటీ రూల్స్ 2021 ప్రకారం 50లక్షల కంటే ఎక్కువ యూజర్లు ఉన్న డిజిటల్ ప్లాట్‌ఫామ్‌లన్నీ నెలవారిగా రిపోర్ట్ వెల్లడించాలి. అందిన ఫిర్యాదులు, యాక్షన్స్‌పై నివేదిక ప్రభుత్వానికి ఇవ్వాలి. అందుకే వాట్సాప్‌ కూడా ప్రతీ నెలా నివేదిక వెల్లడిస్తోంది. ఎన్ని అకౌంట్లు బ్యాన్ చేశామన్న విషయంతో పాటు ఫిర్యాదులను పేర్కొంటోంది. ఇదే క్రమంలో ఏప్రిల్ డేటాను కూడా వెల్లడించింది.

ఈ ఏడాది మార్చిలోనూ 18.5లక్షల భారత వాట్సాప్‌ ఖాతాలపై నిషేధం విధించింది.