అది మహానాడు కాదు.. ఒక మాయనాడు

ఒంగోలులో జరిగినది మహానాడు కాదు.. అది ఒక మాయనాడని తెలుగు అకాడమీ చైర్‌పర్సన్, వైఎస్సార్ కాంగ్రెస్ పార్టీ సీనియర్ నాయకురాలు లక్ష్మీపార్వతి విమర్శించారు. మహానాడుకు 50 వేల మంది హాజరయితే.. తమ పార్టీ చేపట్టిన బస్సు యాత్రకు లక్షల మంది జనం వచ్చారని లక్ష్మీపార్వతి చెప్పారు. సీఎం జగన్ పాలనలో తెలుగుదేశం పార్టీ అధినేత చంద్రబాబు నిస్సహాయ స్థితిలో ఉన్నారని వ్యాఖ్యానించారు.  దుయ్యబట్టారు. కేవలం ముఖ్యమంత్రి వైఎస్ జగన్మోహన్ రెడ్డిని తిట్టడానికి మాత్రమే మహానాడు ఏర్పాటు చేశారని దుయ్యబట్టారు.

సీనియర్ ఎన్టీఆర్ ఉన్నప్పుడు మహానాడులో కేవలం తీర్మానాలు మాత్రమే ప్రవేశపెట్టేవారని.. ఇప్పుడు మాత్రం వ్యక్తిగత దూషణలకే పరిమితమయ్యేవారని లక్ష్మీపార్వతి విమర్శించారు. మహానాడులో ముఖ్యమంత్రి జగన్మోహన్ రెడ్డిని తిట్టిన వాళ్లకే మైకు ఇచ్చారన్నారు. ఈ మహానాడులో తొడలు కొట్టుకోవడం, వ్యక్తిగతంగా దూషించడం దారుణమన్నారు. టీడీపీ ఎప్పుడో చచ్చిపోయిందని.. అందుకే ప్రజలు 23 స్థానాలకే పరిమితం చేశారని ఎద్దేవా చేశారు. టీడీపీ ఇంత దారుణ స్థితి దిగజారుతుందని తాను ఊహించలేదన్నారు.

తెలుగు దేశం పార్టీకి ప్రజాబలం ఉంటే నెల్లూరు జిల్లా ఆత్మకూరు ఉప ఎన్నికలో పోటీ చేసి తీరాలని ఆమె సవాల్ విసిరారు. ఈ మేరకు ప్రకాశం జిల్లాలో లక్ష్మీపార్వతి మాట్లాడుతూ దివంగత ఎన్టీ రామారావు పెట్టిన తెలుగు దేశం పార్టీ వేరని, ఇప్పుడున్న టీడీపీ వేరని పేర్కొన్నారు. చంద్రబాబు చేతిలోకి టీడీపీ వచ్చాక మహిళలను ఘోరంగా అవమానిస్తున్నారని.. లోకేష్ వచ్చాక పార్టీలో సంస్కారం లోపించిందని ఘాటు విమర్శలు చేశారు.