ఛాయ్ కూడా పాకిస్తాన్ కు భారంగా మారుతోందటా

శ్రీలంక పరిణామాల నేపథ్యంలో పాకిస్తాన్ లో కూడా అలజడి మొదలైంది. పాకిస్థాన్‌లో ఆర్థిక సంక్షోభం రోజు రోజుకూ తీవ్రమవుతోంది. నిత్యావసర వస్తువుల ధరల పెరుగుదలతో జనం ఇబ్బందులు పడుతున్నారు. అటు, విదేశీ మారకపు నిల్వలు కూడా వేగంగా తగ్గిపోతున్నాయి. ఈ నేపథ్యంలో టీ తాగడాన్ని తగ్గించుకోవాలని పాకిస్థాన్ ప్రజలకు ఆ దేశ మంత్రి విజ్ఞ‌ప్తి చేశారు. ఫారిన్ ఎక్స్ఛేంజ్ నిల్వలు వేగంగా క్షీణిస్తున్నాయని, దిగుమతి బిల్లును తగ్గించడంలో సహాయపడటానికి టీ వినియోగాన్ని తగ్గించుకోవాలని ఈ మేరకు పాక్ ప్రణాళికా విభాగం మంత్రి అహ్సన్ ఇక్బాల్ సూచించారు.

గత ఆర్థిక సంవత్సరంలో పాకిస్థాన్‌లో 83.88 బిలియన్ డాలర్లు (400 మిలియన్ డాలర్లు) విలువైన తేయాకును వినియోగించినట్టు తేలిన నేపథ్యంలో మంత్రి ఈ ప్రకటన చేశారు. ప్రపంచంలోనే అత్యధికంగా తేయాకును దిగుమతి చేసుకుంటున్న దేశాల్లో పాక్ ఒకటని, ఇందుకోసం అప్పులు చేయాల్సి వస్తోందని మంత్రి అన్నారు. ‘‘టీ వినియోగాన్ని 1-2 కప్పులు తగ్గించాలని నేను దేశానికి విజ్ఞప్తి చేస్తున్నాను.. ఎందుకంటే మనం తేయాకు దిగుమతి కోసం రుణం చేయాల్సి వస్తోంది’’ అని ఆయన వ్యాఖ్యానించారు.

గత ఆర్థిక సంవత్సరం కంటే పాకిస్తాన్ 13 బిలియన్ల (యూఎస్డీ 60 మిలియన్లు) విలువైన టీని దిగుమతి చేసుకున్నట్లు బడ్జెట్ పత్రం వెల్లడించింది. 2020-21 ఆర్థిక సంవత్సరంలో టీ దిగుమతి కోసం 70.82 బిలియన్లు (యూఎస్డీ 340 మిలియన్లు) ఖర్చు చేసినట్లు న్యూస్ నెట్‌వర్క్ ఇంటర్నేషనల్ వార్తా సంస్థ నివేదించింది.

ఇదిలావుంటే మంత్రి చేసిన ప్రకటనపై సామాజిక మాధ్యమాల్లో తీవ్ర విమర్శలు వెల్లువెత్తుతున్నాయి. అహ్సాన్ ఇక్బాల్ నిజంగా చాయ్‌ను తగ్గించమని దేశాన్ని కోరారా? మనల్ని దాని కోసం అడిగారా? మనం అంత తెలివితక్కువవాళ్లమని నిజంగా అనుకుంటున్నారా? అని నెటిజన్ మండిపడ్డారు. ‘‘అహ్సాన్ ఇక్బాల్ దేశాన్ని చాయ్ తగ్గించమని కోరారు.. సారీ, కానీ నేను ఇందులో భాగం కాలేను’’ మరో నెటిజన్ ట్వీట్‌ చేశాడు.

ఇక, విద్యుత్ సంక్షోభం తీవ్రం కావడంతో రాత్రి 8.30 గంటలకే వాణిజ్య సముదాయాలను మూసివేయాలని మంత్రి ఆదేశించారు. దీనివల్ల ఎనర్జీ వినయోగం తగ్గి, పెట్రో ఉత్పత్తుల దిగుమతి బిల్లుల భారం తగ్గడానికి సాయపడుతుందన్నారు. కఠిన నిర్ణయాలు తీసుకోకుంటే దేశంలో శ్రీలంక పరిస్థితులే ఉత్పన్నమవుతాయని ఇటీవల పాక్ ఆర్థిక మంత్రి మిఫ్తాహ్ ఇస్మాయిల్ హెచ్చరించారు.