రెండు తెలియజేసి...మూడోది దాచాడు..సస్పెన్షన్ కు గురయ్యాడు

భార్యలు తెచ్చిన తంటతో ఓ పంచాయతీ కార్యదర్శి తన ఉద్యోగాన్ని కల్పోయాడు. గ్రామ పంచాయతీ కార్యదర్శి ముగ్గురు భార్యలూ స్థానిక ఎన్నికల్లో పోటీకి దిగిన వ్యవహారం మధ్యప్రదేశ్‌లోని సింగ్రౌలీ జిల్లాలో చోటుచేసుకుంది. దీనిని సీరియస్‌గా స్పందించిన అధికారులు.. పంచాయతీ సెక్రెటరీపై చర్యలకు ఉపక్రమించారు. తన మూడో భార్యకు సంబంధించిన సమాచారాన్ని దాచిపెట్టడంతోనే అతడిపై శాఖపరంగా చర్యలు ప్రారంభించారు. సర్పంచ్ (గ్రామాధికారి) పదవికి ఒకరిపై ఒకరు పోటీపడుతున్న ముగ్గురు మహిళలు.. తమ ఎన్నికల నామినేషన్ పత్రంలో గ్రామ పంచాయతీ కార్యదర్శి సుఖ్‌రామ్ సింగ్ తమ భర్తని పేర్కొన్నారు.

నామినేషన్ పత్రంలోని భర్త కాలమ్‌లో ముగ్గురూ ఒకే వ్యక్తి పేరు రాయడంతో విషయం బయటపడింది. పిపార్‌ఖండ్ గ్రామ పంచాయతీ ఎన్నికల్లో సెక్రెటరీ సుఖరామ్ సింగ్ భార్యలు ముగ్గురూ పోటీపడుతున్నారు. ఈ విషయం ఉన్నతాధికారుల దృష్టికి వెళ్లడంతో నివేదిక సమర్పించాలని స్థానిక అధికారులను ఆదేశించారు. దీంతో దేవ్‌సర్ జనపద్ పంచాయతీ చీఫ్ ఎగ్జిక్యూటివ్ ఆఫీసర్ బీకే సింగ్ విచారణ చేపట్టి.. జిల్లా పంచాయతీ సీఈఓకు నివేదికను సమర్పించారు. అతడిపై సస్పెన్షన్ సహా క్రమశిక్షణ చర్యలు తీసుకోవాలని సిఫార్సు చేశారు. ఉద్యోగుల కుటుంబసభ్యులు లేదా బంధువులు ఎవరైనా పంచాయతీ ఎన్నికల్లో పోటీచేస్తే తమ వివరాలను వెల్లడించాలని ఇప్పటికే స్పష్టం చేసినట్టు బీకే సింగ్ పేర్కొన్నారు.

ఇదిలా ఉండగా, ప్రస్తుతం సరాయ్ నగర్ పరిషత్‌లో భాగమైన ఘోఘ్రా గ్రామ పంచాయతీలో సుఖరామ్ సెక్రెటరీగా పనిచేశారు. ఆ సమయంలో తన ఇద్దరు భార్యలూ ఎన్నికల్లో పోటీచేస్తున్నట్టు తెలిపారు. కానీ, మూడో భార్య గీతా సింగ్ విషయాన్ని దాచిపెట్టారని అధికారులు తెలిపారు. దీనిపై షోకాజ్ నోటీసు జారీచేసినా సుఖరామ్ స్పందించలేదని పేర్కొన్నారు. దీంతో అధికారుల ఆదేశాల ప్రకారం నివేదికను సమర్పించి సస్పెన్షన్ సహా క్రమశిక్షణా చర్యలు తీసుకోవాలని సిఫార్సు చేసినట్టు బీకే సింగ్ అన్నారు. నివేదిక ప్రకారం.. సుఖ్‌రామ్ సింగ్ ఇద్దరు భార్యలు కుసుకలి సింగ్, గీతా సింగ్‌ పిపార్‌ఖండ్ గ్రామ పంచాయతీ ఎన్నికల్లో ఒకరిపై ఒకరు పోటీ చేస్తున్నారు. గతంలో గీతా సింగ్ ఇదే పంచాయతీ సర్పంచ్‌గా ఎన్నికయ్యారు. మూడో భార్య ఊర్మిళ సింగ్ పెడ్రా జన్‌పద్ పంచాయతీ మెంబర్‌గా పోటీచేసినట్టు తెలిపింది.