రోప్‌వేపై నిలిచిపోయిన కేబుల్ కార్...రంగంలోకి దిగిన అధికార్లు

రోప్‌వేపై కేబుల్ కార్ ప్రయాణం పర్యాటకులకు ప్రాణసంకటం తెచ్చిపెడుతోంది. తాజాగా  హిమాచల్ ప్రదేశ్‌లోని సిమ్లాలో ఎత్తైన ప్రాంతంలో రోప్‌వేపై ఓ కేబుల్ కార్ నిలిచిపోయింది. ఆ కేబుల్ కారులో పదకొండు మంది పర్యాటకులు చిక్కుకుపోయారు. వీరిని రక్షించేందుకు అధికారులు రంగంలోకి దిగారు. ఇప్పటికే నలుగురిని సురక్షితంగా కిందకు దింపారు. ఇంకా రెస్క్యూ ఆపరేషన్ కొనసాగుతుంది.

అక్కడ పర్వానూలోని టింబర్‌ ట్రెయిల్‌ ప్రైవేట్‌ రిసార్ట్‌కు చెందిన రోప్‌ వేపై వెళ్లే కేబుల్‌ కార్లు ఎంతో ఫేమస్. శివాలిక్ పర్వత శ్రేణుల మీదుగా ఇవి వెళ్తూ పర్యాటకులకు మధురానుభూతిని కలిగిస్తాయి. అక్కడకు వెళ్లిన పర్యాటకులు కచ్చితంగా ఈ రోవ్‌వేపై కేబుల్ కార్లలో ఆ ప్రకృతి సౌందర్యాన్ని ఆస్వాదిస్తారు. అయితే సోమవారం మధ్యాహ్నం 11 మంది పర్యాటకులు ఎక్కిన ఓ కేబుల్ కార్ ఎత్తైన కొండ ప్రాంతంలో ఆగిపోయింది. సాంకేతిక లోపం కారణంగా ఎంతకీ కదలలేదు. దాంతో వారంతా భయాందోళకు గురయ్యారు.

ఆ కేబుల్‌ కార్‌లో ఇద్దరు వృద్ధులు, నలుగురు మహిళలు కూడా ఉన్నారు. వారు సహాయం కోసం అర్తనాదాలు చేశారు. దీనికి సంబంధించిన సమాచారం అందుకున్న స్థానిక అధికారులు, పోలీసులు రంగంలోకి దిగారు. అందులోని ప్రయాణికులను బయటకు తీసుకురావడానికి కేబుల్‌పై రెస్క్యూ టీం అక్కడకు చేరుకుని.. వారిని కేబుల్, పట్టీల సహాయంతో కింద ఉన్న కౌశల్య నదీ లోయలోని కొండపైకి దింపుతున్నారు. ఈ సందర్భంగా "టింబర్ ట్రైల్ ఆపరేటర్ సాంకేతిక బృందం అక్కడకు చేరుకుంది. పోలీసు బృందం పరిస్థితిని పర్యవేక్షిస్తోంది" అని పోలీసు సూపరింటెండెంట్ తెలిపారు.

నేషనల్ డిజాస్టర్ రెస్పాన్స్ ఫోర్స్ బృందం కూడా త్వరలో ఘటనా స్థలానికి చేరుకుంటుందని సబ్ డివిజనల్ మేజిస్ట్రేట్ ధన్బీర్ ఠాకూర్ తెలిపారు. ఇదిలావుంటే ఇదే రోప్‌వేలో 1992లో ఇలాంటి ఘటనే చోటుచేసుకుంది. అప్పుడు కూడా 11 మంది ప్రయాణికులు చిక్కుకుపోగా ఆర్మీ, వైమానిక దళం జరిపిన ఆపరేషన్‌లో 10 మందిని రక్షించారు. ఒకరు మరణించారు. అలాగే ఇటీవల జార్ఖండ్‌లోని డియోఘర్ జిల్లాలో పర్యాటకులు 40 గంటలకు పైగా కేబుల్ కార్లలో చిక్కుకుపోయారు.