ఆ అమ్మాయిలకు 16 ఏళ్లువుంటే చాలు...వారు పెళ్లి చేసుకోవచ్చు

ముస్లిం అమ్మాయిల వివాహ విషయంలో కోర్టు సంచలన తీర్పు ఇచ్చింది. వారు 16 ఏళ్లకే వివాహం చేసుకోవచ్చని తెలిపింది. కొన్ని రోజుల క్రితమే అమ్మాయి పెళ్లి వయస్సు పెంపునకు కేంద్ర కేబినెట్ గ్రీన్ సిగ్నల్ ఇచ్చింది. దీనివల్ల ఆడపిల్లలకు మేలు జరుగుతుందని కేంద్రం చెబుతుంది. కానీ వయస్సు పెంపు వల్ల నష్టాలు ఎక్కువనే వాదనలు ఉన్నాయి. ఈ క్రమంలో పంజాబ్-హర్యానా కోర్టు ఓ ఆసక్తికరమైన తీర్పునిచ్చింది. ముస్లిం అమ్మాయిలు 16 ఏళ్లకే పెళ్లి చేసుకోవచ్చని చెప్పింది. తమకు రక్షణ కల్పించాలని ముస్లిం దంపతులు కోర్టును ఆశ్రయించారు. వారి పిటిషన్‌పై జస్టిస్ జస్జిత్ సింగ్ బేడీతో కూడిన సింగిల్ జడ్జి బెంచ్ తీర్పు వెల్లడించింది.

కోర్టును ఆశ్రయించిన జంట 16 ఏళ్ల అమ్మాయి, 21 ఏళ్ల అబ్బాయి. వారిద్దరూ పెళ్లి చేసుకున్నారు. అయితే త‌మ కుటుంబ స‌భ్యుల నుంచి తమకు భద్రత లేదని వారి నుంచి ర‌క్ష‌ణ కావాల‌ని పంజాబ్ కోర్టులో పిటిషన్ వేశారు. దీనిపై విచారణ జరిపిన కోర్టు సోమవారం తీర్పునిస్తూ 16 ఏళ్లు నిండిన ముస్లిం మ‌హిళ త‌న‌కు న‌చ్చిన వ్య‌క్తిని పెళ్లి చేసుకోవచ్చని పేర్కొంది. ఈ సందర్భంగా "పిటిషనర్లు వారి కుటుంబ సభ్యుల ఇష్టానికి వ్యతిరేకంగా వివాహం చేసుకున్నందున, భారత రాజ్యాంగం కల్పించిన ప్రాథమిక హక్కులను వారు కోల్పోరు" అని ధర్మాసనం పేర్కొంది. ఈ సందర్భంగా జస్టిస్ బేడీ ఇస్లామిక్ షరియా చట్టాన్ని తీర్పులో ప్రస్తావించారు. ముస్లిం అమ్మాయిల‌ పెళ్లిళ్లు ముస్లిం ప‌ర్స‌న‌ల్ చ‌ట్టం ప‌రిధిలోకి వస్తాయని చెప్పారు.

సర్ దిన్‌షా ఫర్దుంజీ ముల్లా రచించిన 'ప్రిన్సిపల్స్ ఆఫ్ మొహమ్మదీన్ లా' పుస్తకంలోని ఆర్టికల్ 195 ప్రకారం 16 ఏళ్లు పైబడిన వారు తనకు నచ్చిన వ్యక్తితో పెళ్లి చేసుకోవడానికి అర్హులని కోర్టు పేర్కొంది. అబ్బాయి వయస్సు 21 సంవత్సరాల కంటే ఎక్కువ అని పేర్కొన్నారు. అందువల్ల, పిటిషనర్లు ఇద్దరూ ముస్లిం వ్యక్తిగత చట్టం ప్రకారం వివాహం చేసుకున్నారని కోర్టు తెలిపింది. ఈ మేరకు ఆ జంటకు సరైన భద్రత కల్పించాలని, చట్ట ప్రకారం అవసరమైన చర్యలు తీసుకోవాలని ఆదేశించింది. ఇదిలావుంటే ఆ ముస్లిం దంపతులు జూన్ 8, 2022న ముస్లిం ఆచారాలు ప్రకారం పెళ్లి చేసుకున్నారు. అయితే తమ అనుమతి లేకుండా పెళ్లి చేసుకున్నందుకు వారి కుటుంబ సభ్యులను ఇద్దరిని బెదిరిస్తున్నారు. దాంతో వారు కోర్టులో పిటిషన్ వేశారు.