ఏదీ లేకపోయినా పర్వాలేదు..మీరు ఉద్యోగంలో చేరేందుకు రెఢీనా

కరోనా కాలంలో ఉన్న ఉద్యోగాలు ఉడిపోతే తాజాగా ఉద్యోగాల కోసం డిమాండ్ పెరుగుతోంది.  ఇది ఎక్కడో తెలుసా..? ఇక ఉద్యోగం కోసం కూడా అక్కడ ఉద్యోగ అర్హతను అడగడంలేద. ఎక్స్‌పీరియెన్స్, రెజ్యూమె లేకపోయినా పర్వాలేదు.. మేము మిమ్మల్ని నియమించుకుంటాం అంటున్నాయి టాప్ యూరోపియన్ హోటల్ కంపెనీలు. కరోనా మహమ్మారి తర్వాత ట్రావెల్‌కు బాగా డిమాండ్ పెరగడంతో.. ఆ డిమాండ్‌ను చేరుకోవడంలో హోటళ్లు, రెస్టారెంట్లు విఫలమవుతున్నాయి. తీవ్ర ఉద్యోగ కొరతను ఈ యూరోపియన్ హోటల్ చెయిన్స్ ఎదుర్కొంటున్నాయి. కరోనా మహమ్మారి సమయంలో అంతర్జాతీయంగా ప్రయాణాలు ఎక్కడికక్కడ స్తంభించడంతో.. హాస్పిటాలిటీ ఇండస్ట్రీలో వేల మంది ఉద్యోగులు తమ జాబ్స్‌ను కోల్పోయారు. ఉద్యోగాలు కోల్పోవడంతో వారు తిరిగి తమ సొంత ప్రాంతాలకు వెళ్లారు. ప్రస్తుతం ఈ ఉద్యోగులు తిరిగి ఆఫీసులకు వచ్చేందుకు ఇష్టపడటం లేదు. మంచి పేమెంట్ చేసే ఉద్యోగం కోసం చూస్తున్నారు. దీంతో హోటళ్లు ఇండస్ట్రీ తీవ్ర ఉద్యోగ కొరతను ఎదుర్కొంటోంది.

ఇంతకుముందు హోటల్స్‌ ఇండస్ట్రీలో పనిచేయని వారిని రిక్రూట్ చేసుకునేందుకు యూరప్‌లోని అతిపెద్ద హోటల్ సంస్థ అకార్ చూస్తోంది. ఈ విషయాన్ని గత నెలలో ఖతార్ ఎకనామిక్ ఫోరమ్‌లో రాయిటర్స్‌తో జరిపిన ఇంటర్వ్యూలో అకార్ చీఫ్ ఎగ్జిక్యూటివ్ సెబాస్టియన్ బెజిన్ తెలిపారు. అంతేకాక రెజ్యూమె, ఎక్స్‌పీరియెన్స్ లేని వారిని కూడా తాము ఇంటర్వ్యూ చేశామని, వారిని 24 గంటల్లో రిక్రూట్ చేసుకున్నట్టు చెప్పారు. 110 దేశాలలో అకార్ తన కార్యకలాపాలను నిర్వహిస్తోంది. ఈ హోటల్ సంస్థలో పనిచేసేందుకు ప్రపంచవ్యాప్తంగా 35 వేల మంది ఉద్యోగులు కావాల్సి ఉంది. ఎలాంటి అనుభవం, రెజ్యూమె లేకపోయినా ఈ హోటల్ చెయిన్ ఉద్యోగులను నియమించుకుంటోంది. ఫ్రాన్స్‌లో యువత, వలసదారులతో అకార్ తన ఖాళీలను భర్తీ చేస్తోంది.

కొత్తగా రిక్రూట్ చేసుకునే ఉద్యోగులకు ఈ హోటల్ సంస్థ ఆరు గంటల పాటు ట్రైనింగ్ ఇచ్చి, జాబ్ స్కిల్స్‌ను నేర్పిస్తోంది. ఉద్యోగుల కొరత ముఖ్యంగా స్పెయిన్, పోర్చుగల్‌లో ఎక్కువగా ఉంది. దీంతో హోటల్స్‌లో పనిచేసే వారికి అత్యధిక వేతనాలను, ఉచిత వసతిని, బోనస్‌లు, హెల్త్ ఇన్సూరెన్స్ వంటి ఇతర ప్రయోజనాలను ఈ సంస్థలు ఆఫర్ చేస్తున్నాయి. ‘కరోనా తర్వాత చాలా మంది ఉద్యోగులు వేరే రంగాలకు తరలి వెళ్లారు. ప్రస్తుతం మేము ప్రతిభావంతులైన ఉద్యోగుల కోసం చూస్తున్నాం’ అని స్పానిష్ హోటల్ సంస్థ మెలియా సీఈవో గాబ్రియెల్ ఎస్కార్రర్ చెప్పారు. స్పెషల్ కేటరింగ్ ఇండస్ట్రీలో 2 లక్షల మంది వర్కర్ల కొరత, పోర్చుగీస్ హోటల్స్‌కి 15 వేల మందికి పైగా ఉద్యోగులు కావాల్సి ఉంది. స్పెయిన్‌లో రెస్టారెంట్లు, బార్లలో ఉద్యోగుల వేతనాలు తొలి క్వార్టర్‌లో 60 శాతం పెరిగాయి.