ఇన్‌స్టాంట్ లోన్ యాప్‌లలో రుణం తీసుకొంటున్నారా..అయితే ఇది తెలుసుకోండి

ఇన్‌స్టాంట్ లోన్ అంటేనే ఎవరికైనా ఇష్టమే. సులభంగా ఈ పద్దతిలో లోన్ దొరుకుతుంది. కానీ ఆపై పడే వడ్డీ గురించి ఎంతమందికి తెలుసు.  ఇన్‌స్టాంట్ లోన్ యాప్‌లలో రుణాలు తీసుకున్న 58 శాతం మందిపై వార్షికంగా 25 శాతానికి పైగా వడ్డీ రేట్లను విధించినట్టు తాజా రిపోర్టులో తెలిసింది. గత రెండేళ్లలో ఇన్‌స్టాంట్ లోన్ యాప్స్ ద్వారా రుణాలు తీసుకున్న వారిపై ఈ వడ్డీ రేట్లను విధించినట్టు కమ్యూనిటీ డ్రైవన్ సోషల్ మీడియా ప్లాట్‌ఫామ్ లోకల్ సర్కిల్స్ రిపోర్టు తెలిపింది. దేశవ్యాప్తంగా 409 జిల్లాల్లో 27,500 మందికి పైగా పౌరులపై ఈ కంపెనీ సర్వే చేపట్టింది. వీరిలో గత రెండేళ్లలో 14 శాతం మంది రెస్పాడెంట్లు ఇన్‌స్టాంట్ లోన్ యాప్‌లను వాడుతున్నారు. వారిలో 58 శాతం మంది హౌస్ హోల్డ్స్ ఇన్‌స్టాంట్ లోన్ యాప్స్ ద్వారా రుణాలను తీసుకున్నట్టు తెలిపారు. తమపై వార్షికంగా 25 శాతానికి పైగా వడ్డీ రేట్లను విధించినట్టు పేర్కొన్నారు. అంతేకాక డేటా సేకరణ ప్రక్రియలో తమ డేటాను దుర్వినియోగం చేస్తున్నట్టు కూడా సర్వేలో పాల్గొన్న 54 శాతం మంది సిటిజన్లు తెలిపారు.

కన్జూమర్స్ నుంచి సేకరించిన సమాచారం ప్రకారం, ఈ ఇన్‌స్టాంట్ లోన్ యాప్‌లు సాధారణంగా రూ.3 వేల నుంచి రూ.5 వేల రుణానికి 30 శాతం నుంచి 60 శాతం వడ్డీ రేటును విధిస్తున్నట్టు తెలిసింది. లోన్ మొత్తం, తిరిగి చెల్లించే కాలం బట్టి ఈ వడ్డీ రేట్లు ఉంటున్నట్టు రిపోర్టు పేర్కొంది. చాలా ఇన్‌స్టాంట్ లోన్ యాప్‌లు కరోనా మహమ్మారి తర్వాత పుట్టుకొచ్చాయి. చాలా మంది ఉద్యోగాలు కోల్పోవడంతో.. వారిని ఆర్థికంగా ఆదుకుంటామంటూ ఈ లోన్ యాప్స్ మార్కెట్లోకి ప్రవేశించాయి. కానీ వీటి వడ్డీ రేట్లు మాత్రం బీభత్సంగా, దారుణంగా ఉన్నాయి. కరోనా మహమ్మారి సమయంలోనే కొన్ని ప్లాట్‌ఫామ్స్ 400 శాతం నుంచి 500 శాతం వరకు వడ్డీ రేటును విధించాయి.

ఈ లోన్ యాప్స్ కస్టమర్లతో ప్రవర్తిస్తున్న విధానంపై సీరియస్ అయిన ఆర్‌బీఐ గవర్నర్ శక్తికాంత దాస్.. త్వరలోనే డిజిటల్ లెండింగ్ ప్లాట్‌ఫామ్‌లకు రెగ్యులేటరీ ఫ్రేమ్‌వర్క్‌ను తీసుకురానున్నామని ప్రకటించారు. ఈ లెండింగ్ యాప్స్ వేధింపులను తట్టుకోలేక చాలా మంది ఆత్మహత్య చేసుకుంటున్నారు. లెండింగ్ యాప్స్‌పై పెద్ద ఎత్తున ఫిర్యాదులు కూడా అందుతున్నట్టు ఆర్‌బీఐ తెలిపింది. ఈ యాప్స్ తమ వద్ద రిజిస్టర్ అయి, తమ ఫ్రేమ్‌వర్క్ కిందకి తీసుకొస్తే.. వీటిపై తాము చర్యలు తీసుకోగలుగుతామని ఆర్‌బీఐ తెలిపింది.