ఆఫ్రికాలో ఎబోలా మార్బర్గ్ వైరస్...గుర్తించిన వైద్యులు

ఆఫ్రికాలో ఇటీవల ఎబోలా లాంటి మార్బర్గ్ వైరస్ పుట్టుకొచ్చిందని వైద్యులు గుర్తించారు. దీనిని డబ్ల్యూహెచ్ఓ సైతం ధ్రువీకరించింది. ఇటీవల ప్రపంచంలోని వివిధ దేశాల్లో రకరకాల వైరస్‌లు పుట్టుకొస్తున్నాయి. ఇప్పటికే కరోనా, ఎబోలా వంటి ప్రమాదకరమైన వైరస్‌లతో ప్రపంచం పోరాడుతుంది. ఇదే సందర్భంలో ఇంకో వైరస్ ఉనికిలోకి వచ్చింది. వాటికి సంబంధించిన రెండు అనుమానిత కేసులు కూడా నమోదయ్యాయి. ఆఫ్రికాలోని ఘనా దేశంలో ఎబోలా లాంటి మార్బర్గ్ వైరస్ వెలుగు చూసింది. ఘనాలోని సరదన్ అశాంతి ప్రాంతంలో మార్బర్గ్ వైరస్‌కు సంబంధించి రెండు అనుమానాస్పద కేసులు నమోదయ్యాయి. వ్యాధి సోకిన ఆ ఇద్దరు బాధితులు ప్రాణాలు కోల్పోయారు.

ఎబోలా కుటుంబానికి చెందిన మార్బర్గ్ వైరస్ కారణంగా ఈ వ్యాధి సంక్రమిస్తుంది. ముఖ్యంగా వైరస్ సోకిన జంతువులు, వ్యక్తుల స్రావాలను నేరుగా తాకడం వల్ల లేదా అవి తాకిన ప్రదేశాలను ముట్టుకోవడం వల్ల మానవుల్లో ఒకరి నుంచి మరొకరికి వ్యాప్తిస్తుంది. వైరస్ సోకిన రెండు నుంచి 21 రోజుల్లో ఇది బయటపడుతుంది. జ్వరం, తలనొప్పి, ఆయాసం వంటి లక్షణాలతో అకస్మాత్తుగా తీవ్ర అనారోగ్యం బారినపడతారు. చాలా మంది రోగులు ఏడు రోజుల్లో తీవ్ర అవస్వస్థతకు గురవుతారు. ఈ వ్యాధి సోకిన వారిలో మరణాల రేటు 88 శాతం వరకు ఉంటుంది.

ఇదిలావుంటే ఈ మరణాలను ప్రపంచ ఆరోగ్య సంస్థ ధ్రువీకరించింది. ఇద్దరు బాధితులతో సన్నిహితంగా మెలిగిన 34 మందిని గుర్తించినట్టు తెలిపింది. ప్రస్తుతం వారిని క్వారంటైన్‌లో ఉంచి, వారి ఆరోగ్యాన్ని ఎప్పటికప్పుడు పర్యవేక్షిస్తున్నట్టు తెలియజేసింది. అయితే ఆస్పత్రిలో చనిపోయిన ఇద్దరు బాధితుల్లోనూ డయేరియా, జ్వరం, వికారం, వాంతులు వంటి లక్షణాలు కనిపించినట్టు తెలిపింది. "స్థానిక అధికారులు స్థానిక పరిస్థితిని పరిశీలిస్తున్నారు. వైరస్ వ్యాప్తిని నియంత్రించేందుకు ఆ దేశంతో కలసి పనిచేస్తున్నాం." అని ఘనాలోని ప్రపంచ ఆరోగ్య సంస్థ ప్రతినిధి డాక్టర్ ఫ్రాన్సిస్ కసోలో అన్నారు.