దేశ మూలవాసులు గిరిజనులు, ద్రావిడులు మాత్రమే...యోగి ఇది గుర్తుంచుకోవాలి

ఈ దేశ మూలవాసులు గిరిజనులు, ద్రావిడులు మాత్రమేనన్న విషయాన్ని యూపీ సీఎం యోగి ఆథిత్యనాథ్ గుర్తించుకోవాలని ఎంఐఎం అధినేత, ఎంపీ అసదుద్దీన్ ఓవైసీ సూచించారు. జనాభా విషయంలో భారత్ త్వరలోనే చైనాను దాటేయనుంది. 2023 నాటికి ప్రపంచంలో అత్యధిక జనాభా ఉన్న దేశంగా భారత్ నిలవనుందని ఐక్యరాజ్య సమితి ప్రకటించింది. ఈ నేపథ్యంలో ఉత్తరప్రదేశ్ సీఎం యోగీ ఆదిత్యనాథ్ జనాభా నియంత్రణ గురించి కీలక కామెంట్స్ చేశారు. దేశంలో జనాభా నియంత్రణ కార్యక్రమం ముందుకు సాగాలని, కానీ అదే సమయంలో జనాభా అసమతుల్యత ఉండొద్దని.. అది అరాచకానికి దారి తీస్తుందన్నారు. యోగి చేసిన వ్యాఖ్యలు రాజకీయ దుమారం రేపాయి.

యోగీ చేసిన జనాభా అసమతుల్యత కామెంట్స్‌పై అసదుద్దీన్ ఓవైసీ సీరియస్ అయ్యారు. ముస్లింలు భారతదేశ మూలవాసులు కాదా అని ప్రశ్నించారు. ప్రతిసారీ జనాభా అసమతుల్యత ప్రస్తావన ఎందుకు వస్తోందని ఓవైసీ ప్రశ్నించారు. నిజానికి దేశంలో మూలవాసులు గిరిజనులు, ద్రావిడులు మాత్రమేనన్నారు. జనాభా అంశం గురించి చర్చ జరిగిన ప్రతీసారి అసమతుల్యత అంశాన్ని తెరపైకి తీసుకురావడం సబబు కాదని హితవు పలికారు.

ఉత్తరప్రదేశ్ రాష్ట్రంలో ఎలాంటి జనాభా నియంత్రణ చట్టం లేకుండానే, 2026-2030 మధ్య ఆశించిన సంతానోత్పత్తి నమోదవుతుందని ఆయన ఆశాభావం వ్యక్తం చేశారు. దేశంలో జనాభా నియంత్రణకు ఎలాంటి చట్టం అవసరం లేదని, ఆ విషయాన్ని వారి సొంత పార్టీ ఆరోగ్య మంత్రి చెప్పారని గుర్తుచేశారు అసదుద్దీన్ఓవైసీ. జనాభా నియంత్రణ కోసం.. గర్భనిరోధక సాధనాలను ఎక్కువగా ముస్లింలు ఉపయోగిస్తున్నారని ఈ సందర్భంగా ఓవైసీ వెల్లడించారు. దేశ సంతానోత్పత్తి రేటు 2016లో 2.6గా ఉండగా.. ఇప్పుడు 2.3కి తగ్గిందని అసదుద్దీన్ ఓవైసీ వివరించారు. ప్రపంచంలోని అన్ని దేశాలకంటే, భారత్‌లో జానాభా సమతుల్యత మెరుగ్గా ఉందన్నారు.