ఫేక్ సర్టిఫికేట్ తో ఉద్యోగానికి వెళ్లాడు....చివరకు కట్టకట్టాల పాలయ్యాడు

మోసం ఎప్పటికైనా బయటపడుతుంది. నిజం నిప్పులాగా నిలకడగా నిలబడుతుంది. ఫేక్ సర్టిఫికెట్లు పెట్టి ఉద్యోగం సంపాదించాలనుకునే వారికి ఇదొక హెచ్చరిక లాంటి ఘటన. ప్రముఖ కంపెనీని ఓ యువకుడు నకిలీ సర్టిఫికెట్లు పెట్టి బురిడీ కొట్టించాడు. ఆ సర్టిఫికెట్లతో కంపెనీలో ఉద్యోగం సంపాదించేందుకు ప్రయత్నించాడు. కానీ, కథ అడ్డం తిరిగింది. చివరికి జైలు పాలయ్యాడు. అవి నకిలీ సర్టిఫికెట్లుగా గుర్తించిన వెంటనే గచ్చిబౌలిలోని ప్రముఖ సాఫ్ట్‌వేర్ కంపెనీ యాజమాన్యం పోలీసులకు ఫిర్యాదు చేశారు. కంపెనీ ఇచ్చిన ఫిర్యాదు మేరకు పోలీసులకు కేసు నమోదు చేసుకొని నిందితుడిని అరెస్ట్ చేశారు. అతడిని అదుపులోకి తీసుకొని విచారించారు.

మల్లికార్జున్ అనే యువకుడు బాగా చదువుకోలేదు. కానీ, పెద్ద కంపెనీలో ఉద్యోగం కావాలనుకున్నాడు. ఇంటర్మీడియట్ వరకే చదువుకున్న అతడు.. ఫేక్ డిగ్రీ సర్టిఫికెట్లు సృష్టించాడు. హిమాచల్ ప్రదేశ్‌కు చెందిన ఓ యూనివర్సిటీ పేరుతో సర్టిఫికెట్లు సమర్పించి ఉద్యోగానికి దరఖాస్తు చేసుకున్నాడు. రిక్రూట్‌మెంట్ ప్రొసీజర్‌లో భాగంగా ఆ సర్టిఫికెట్లను తనిఖీ చేసిన కంపెనీ.. ఆ సర్టిఫికెట్లపై అనుమానంతో పోలీసులకు ఫిర్యాదు చేసింది.

కంపెనీ ఫిర్యాదు మేరకు కేసు నమోదు చేసుకున్న పోలీసులు.. లోతుగా దర్యాప్తు జరిపి మల్లికార్జున్‌తో పాటు అతడికి ఫేక్ సర్టిఫికెట్లు ఇప్పించిన ఇద్దరు దళారులను కూడా అరెస్ట్ చేశారు. ఇలాంటి దళారుల మాటలు నమ్మి కెరీర్ నాశనం చేసుకోవద్దని పోలీసులు సూచిస్తున్నారు. ఆ యువకుడికి భవిష్యత్తులో ఎక్కడా జాబ్ వచ్చే అవకాశం లేదని నిపుణులు చెబుతున్నారు.