సముద్ర అడుగు భాగంలో అరుదైన జీవి...కొనుగొన్న పరిశోధకులు

మన చూడని వింతలు ఎన్నో ఉన్నాయని పరిశోధనల ద్వారా వెలుగులోకి వచ్చేంతవరకు వాటి గురించి మనకూ తెలియదు. తాజాగా సముద్ర అడుగు భాగంలో కనిపించే అత్యంత అరుదైన ‘సీ పెన్ (సొలుంబెల్లులా మోనోసెఫలస్)’ జీవిని తాజాగా పసిఫిక్ సముద్రం అడుగున గుర్తించారు. చూడటానికి ఓ ఆక్టోపస్ తరహాలో కనిపిస్తున్నా.. ఈ జీవి దానికి పూర్తి విరుద్ధంగా ఉంటుంది. పొడుగాటి గొట్టం వంటి నిర్మాణం (స్టాక్)తో సముద్రం అడుగు భాగానికి అతుక్కుని ఉండే ఈ జీవి.. నీటిలో మధ్యలో తేలుతున్నట్టుగా ఉంటూ, దానికి ఉన్న టెంటకిల్స్ తో ఆహారాన్ని పట్టేసుకుంటూ ఉంటుందని పరిశోధకులు చెబుతున్నారు. ప్రపంచ ప్రఖ్యాత పరిశోధక నౌక ఈవీ నౌటిలిస్ శాస్త్రవేత్తలు.. పసిఫిక్ మహా సముద్రంలోని జాన్ స్టన్ అటోల్ ప్రాంతంలో ఈ ‘సీ పెన్’ను గుర్తించారు.

సముద్రపు నేలలోంచి రెండు మీటర్ల పొడవైన స్టాక్ తో వేలాడుతున్నట్టుగా ఉన్న ఈ ‘సీ పెన్’కు.. 40 సెంటీమీటర్ల వెడల్పున టెంటకిల్స్ ఉన్నట్టు శాస్త్రవేత్తలు గుర్తించారు.  1914లో మంచు కొండను ఢీకొని మునిగిపోయిన టైటానిక్ నౌకను గుర్తించినది కూడా నౌటిలిస్ నౌక సాయంతోనే కావడం గమనార్హం. దీనితోపాటు సముద్రంలో మునిగిన ప్రఖ్యాత జర్మన్ యుద్ధ నౌక బిస్మార్క్ ను కూడా ఈ పరిశోధక నౌక శాస్త్రవేత్తలు, సిబ్బందే గుర్తించారు. మహా సముద్రాలపై తిరుగుతూ.. అడుగున ఉన్న విశేషాలపై ఈ నౌక పరిశోధనలు చేస్తూ ఉంటుంది. అమెరికాలోని లాస్ ఏంజిల్స్ కేంద్రంగా ఉన్న ‘ఓసియన్ ఎక్స్ ప్లోరేషన్ ట్రస్ట్’ ఆధ్వర్యంలో ఈ నౌక నడుస్తుంది. ఇప్పటి వరకు సముద్రంలో ఎన్నో రకాల విశేషాలను, వింత వింత జీవులను నౌటిలిస్ నౌక గుర్తించింది.