ఆ మూలికకు ఎంతో డిమాండ్ మరి

ప్రపంచవ్యాప్తంగా ప్రతి వ్యక్తి ఖర్చుచేసే వాటిలో అగ్రస్తానంలో వైద్యమే నిలుస్తోంది. ఆరోగ్యమే మహాభాగ్యం అంటారు పెద్దలు. నేడు ఆరోగ్యం కోసం పరితప్పించే వారు ఎక్కువయ్యారు. ఇదిలావుంటే హిమాలయాల్లో దొరికే ఓ అరుదైన మూలిక అంతర్జాతీయ మార్కెట్‌లో కిలో రూ.25 లక్షల వరకూ పలుకుతుంది. హిమాలయ వయాగ్రా లైంగిక సామర్థ్యాన్ని పెంచుతుందని, అనేక ప్రాణాంతక వ్యాధుల నుంచి రక్షిస్తుందని అంతా భావిస్తారు. అందుకే అంతర్జాతీయంగా దీనికి భారీ డిమాండ్ ఉంది. అటువంటి ఔషధాన్ని ఓ సామాన్యుడు ప్రయోగశాలలోనే సృష్టించి అద్భుతం చేశాడు. హిమాలయాల్లో లభ్యమయ్యే అత్యంత అరుదైన ఔషధ మూలిక ‘కీడా జడీ’ని  కృత్రిమంగా అభివృద్ధి చేసినట్లు హిమాచల్‌ ప్రదేశ్‌ కుల్లూకు చెందిన గౌరవ్‌ శర్మ ప్రకటించాడు. తన ఇంట్లోనే చిన్నపాటి ప్రయోగశాలను ఏర్పాటు చేసి తొలిదశలో 3వేల బాక్సుల కీడా జడీని సాగు చేసినట్లు వివరించాడు.

ఫంగస్ జాతికి చెందిన‘కీడా జడీ’ని క్యాటర్‌పిల్లర్ ఫంగస్ అని పిలుస్తారు. ఎందుకంటే ఇది గొంగళి పురుగు ఆకారంలో ఉంటుంది. దీని శాస్త్రీయనామం ఓఫియోకార్డిసెప్స్ సినెన్సిస్ . టిబెట్ ప్రాంతంలో యార్స్‌గుంబా అంటారు. ఈ అరుదైన మూలికలు సాధారణంగా సముద్ర మట్టానికి 3,600 నుంచి 5,000 అడుగుల ఎత్తులో ఉండే ఉత్తరాఖండ్‌లోని హిమాలయాల్లో లభ్యమవుతాయి.

చాలా అరుదైన ఈ మూలికను ఇంటర్నేషనల్ యూనియన్ ఫర్ కన్జర్వేషన్ ఆఫ్ నేచర్ (ఐయూసీఎన్) అంతరించిపోతున్న జాతుల జాబితాలో చేర్చింది. కొన్ని సంవత్సరాల కిందట ఉత్తరాఖండ్ ప్రభుత్వం దాదాపు 1000 మంది గ్రామస్థులకు ఈ ఫంగస్‌ను సేకరించడానికి వారి సంబంధిత జిల్లా అధికార యంత్రాంగం ద్వారా పాస్‌లు ఇచ్చింది. ఐయూసీఎన్ ప్రకారం స్థానికంగా ఉండే ఈ ఫంగస్ వ్యాప్తి గత 15 సంవత్సరాలలో కనీసం 30% తగ్గింది. ఈ మూలికను లైంగిక పటుత్వం లేని వ్యక్తులకు చికిత్స కోసం 1000 ఏళ్ల కిందటే వినియోగించడం గమనార్హం. ఇక, ఉత్తరాఖండ్‌తో పాటు చైనా, భూటాన్, నేపాల్ హిమాలయ ప్రాంతాల్లోనూ ఇది దొరుకుతుంది.