కీచక ఉపాధ్యాయుడికి...79 ఏళ్ల కఠిన కారాగార శిక్ష

గురువు అంటే తండ్రితో సమానమంటారు. అలాంటి గురువులే బాలికల పట్ల కామాంధులుగా వ్యవహిస్తున్నారు. గురువు స్థానంలో ఉండి విద్యార్థులను తీర్చిదిద్దాల్సిన ఓ ఉపాధ్యాయుడు కీచకుడిలా ప్రవర్తించి లైంగిక దాడులకు పాల్పడ్డాడు. అభం శుభం తెలియని చిన్నారులను లైంగికంగా వేధించినట్టు అభియోగాలు రుజువు కావడంతో న్యాయస్థానం అతడికి తగిన శిక్ష విధించింది. నలుగురు విద్యార్థినులను లైంగికంగా వేధించిన కామాంధుడికి 79 ఏళ్ల కఠిన కారాగార శిక్ష విధిస్తూ కేరళలోని తాలిపరంబ ఫాస్ట్‌ట్రాక్ పోస్కో కోర్టు తీర్పు వెలువరించింది. అంతేకాదు, రూ.2.7 లక్షల భారీ జరిమానా కూడా చెల్లించాలని జడ్జి ముజీబ్ రెహమాన్ ఆదేశాలు జారీ చేశారు.

కేసు పూర్వాపరాలను పరిశీలిస్తే కన్నూరులోని లోయర్ ప్రైమరీ స్కూల్లో గణిత ఉపాధ్యాయుడిగా పనిచేస్తున్న పీఈ గోవిందన్ నంబూద్రి (50) 2013 జూన్ నుంచి 2014 ఫిబ్రవరి మధ్య చిన్నారులకు దారుణానికి ఒడిగట్టాడు. స్కూల్‌లో 4, 5వ తరగతులకు చెందిన నలుగురు విద్యార్థినులపై తరచూ లైంగిక దాడులకు పాల్పడినట్టు అభియోగాలు నమోదయ్యాయి. పోస్కో చట్టం కింద కేసు నమోదుచేసిన పోలీసులు దర్యాప్తు ప్రారంభించారు. గణిత పాఠ్యాంశాల్లో ఎదురయ్యే క్లిష్టమైన సమస్యల పరిష్కారం పేరుతో గదిలోకి పిలిపించి వారిపై లైంగిక చర్యలకు పాల్పడినట్టు పోలీసుల దర్యాప్తులో తేలింది. తమ పిల్లలపై ఉపాధ్యాయుడు చేస్తున్న దారుణం గురించి స్కూల్ యాజమాన్యానికి తల్లిదండ్రులు ఫిర్యాదు చేసినా ఎటువంటి చర్యలు తీసుకోలేదు. దీంతో హెడ్ మాస్టర్, స్కూల్ హెల్ప్‌డస్క్ ఇంఛార్జిల పేర్లను ఛార్జ్‌షీట్‌లో పోలీసులు చేర్చారు. అయితే, విచారణ తర్వాత పోస్కో కోర్టు వారిని నిర్దోషులుగా ప్రకటించింది.