పాముకాటుకు అన్న మరణం..అంత:క్రియలకు వచ్చిన తమ్ముడిని కూడా కాటేసింది

కొన్ని ఘటనలు నిజజీవితంలోనూ విస్తుగొలిపేలా ఉంటాయి. సినిమాలు చూసే కథలను నిజ జీవితంలోనూ చూడాల్సి వస్తోంది. పాముకాటుతో మరణించిన తన సోదరుడి అంత్యక్రియలకు హాజరైన వ్యక్తి సైతం.. నిద్రలో ఉండగా పాము కాటువేసింది. కుటుంబంపై విధి పగబట్టిందా అన్న తరహా విషాదకర ఘటన ఉత్తర్‌ప్రదేశ్‌లోని బలరామ్‌పూర్ జిల్లాలో చోటుచేసుకుంది. స్థానిక సీఐ రాధారమణ్‌ సింగ్‌ వెల్లడించిన వివరాల ప్రకారం.. భవానీపుర్‌కు చెందిన అర్వింద్‌ మిశ్రా (38) మంగళవారం రాత్రి పాముకాటుతో మృతి చెందాడు. బుధవారం జరిగిన అంత్యక్రియలకు లూధియానాలో ఉండే సోదరుడు గోవింద్‌ మిశ్రా (22) హాజరయ్యాడు. అదే రోజు రాత్రి ఇంట్లో నిద్రిస్తుండగా.. గోవింద్‌ సహా అతడి బంధువైన చంద్రశేఖర్ పాండే (22)ల పాము కాటేసిందని సీఐ తెలిపారు.

ఈ ఘటనలో గోవింద్‌ మిశ్రా మృతి చెందగా.. పాండేను చికిత్స కోసం ఆసుపత్రికి తరలించారు. అతడి పరిస్థితి కూడా విషమంగా ఉందని అధికారి తెలిపారు. గోవింద్ మిశ్రా, చంద్రశేఖర్ పాండే ఇద్దరూ అర్వింద్ మిశ్రా అంత్యక్రియల కోసం లూథియానా నుంచి వచ్చారని పోలీసులు పేర్కొన్నారు. ఈ ఘటన గురించి సమాచారం అందుకున్న ఉన్నతాధికారులు గురువారం భవానీపూర్ గ్రామాన్ని సందర్శించారు. స్థానిక ఎమ్మెల్యే కైలాశ్‌ నాథ్ శుక్లా బాధిత కుటుంబాన్ని పరామర్శించి సాయం చేస్తామని హామీ ఇచ్చారు. భవిష్యత్తులో ఇలాంటి ఘటనలు జరగకుండా చర్యలు తీసుకోవాలని స్థానిక అధికారులకు ఎమ్మెల్యే సూచించారు.

ఇదిలా ఉండగా.. 1975లో ఓ కుటుంబంలో ఇటువంటి విషాదమే చోటుచేసుకుంది. రోడ్డు ప్రమాదంలో ఎర్స్కైన్ ఇబిన్ అనే టీనేజర్ చనిపోయిన ఏడాది తర్వాత అతడి సోదరుడు నెవెల్లే ఎబిన్ కూడా అదే రోజున మోపేడ్ నడుపుతూ రోడ్డు ప్రమాదానికి గురైన మృతి చెందాడు. యాదృశ్చికంగా అన్నయ్య నడిపిన బైక్, ప్రమాదానికి గురైన ప్రాంతం, ఢీకొట్టిన ట్యాక్సీ, డ్రైవర్, ట్యాక్సీలో ఉన్న ప్రయాణికుడు ఒక్కరే కావడం గమనార్హం.