పార్లమెంట్ విలువ కాపాడాలంటే గోరంట్ల పై చర్యలు తీసుకోవాల్సిందే
Andhra Pradesh Telugu | Suryaa Desk | Published : Sat, Aug 06, 2022, 08:06 PM
పార్లమెంట్ విలువ కాపాడాలంటే గోరంట్ల మాధవ్ పై చర్యలు తీసుకోవాల్సిందేనని టిడిపి సీనియర్ నేత మాజీ మంత్రి సోమిరెడ్డి చంద్రమోహన్ రెడ్డి పేర్కొన్నారు. వైసీపీ ఎంపీ గోరంట్ల మాధవ్ నగ్న వీడియో కాల్ వ్యవహారంపై సోమిరెడ్డి చంద్రమోహన్ రెడ్డి స్పందించారు. గోరంట్ల మాధవ్ పై ఇంకా చర్యలు తీసుకోకపోవడం ఏంటని వైసీపీ అధినాయకత్వాన్ని ప్రశ్నించారు. ఇప్పటికే మాధవ్ ను సస్పెండ్ చేసి ఉండాల్సిందని అన్నారు. ఆ వీడియో ఒరిజినలో, కాదో సీఎం జగన్ కు, సకల శాఖల మంత్రి సజ్జలకు కళ్లు కనిపించడంలేదా? అని నిలదీశారు.
ఎవరైనా అధికారో, లేక విపక్షాలకు చెందినవారో ఏదైనా చేసుంటే ఈపాటికే చర్యలు తీసుకుని ఉండేవారని, సొంత పార్టీ ఎంపీ కాబట్టి చూసీచూడనట్టు వ్యవహరిస్తున్నారని సోమిరెడ్డి మండిపడ్డారు. ఇది సరైన పద్ధతి కాదని హితవు పలికారు. పార్టీ నుంచి సస్పెండ్ చేయడమే కాకుండా, పార్లమెంటు విలువ కాపాడాలంటే అతడిని ఎంపీ పదవి నుంచి బర్తరఫ్ చేయాలని అన్నారు.
"ఏదైనా బూతు సినిమా తీస్తే దాన్ని అడ్డుకునేందుకు చట్టం ఉంది. కానీ ఇవాళ నువ్వు దేశం మొత్తానికి బూతు సినిమా చూపించావు. ఇది దేశ ప్రజలు చేసుకున్న కర్మ! నీ ముఖాన్ని చూడాల్సి వచ్చింది, నీ వేషాలు చూడాల్సి వచ్చింది అంటూ గోరంట్ల మాధవ్ పై మండిపడ్డారు.
|
|