మీ ఆర్డర్ వివరాలతో సైబర్ నేరగాళ్లు విరుచుకుపడతారు జాగ్రత్త

సాంకేతికత పెరిగాక ఆన్ లైన్ విక్రమాలు కూడా జోరందుకొన్నాయి. దీనిని అదునుగా చేసుకొని సైబర్ నేరగాళ్లు రెచ్చిపోతున్నారు. ఈ క్రమంలనే దేశ వ్యాప్తంగా సైబర్ నేరాలు రోజురోజుకు పెరిగిపోతున్నాయి. గల్లీ నుంచి ఢిల్లీ వరకూ ఇలాంటి కేసులు నమోదవుతూనే ఉన్నాయి. ఫోన్లు, నెట్ వాడకం ఎక్కువవడం.. డిజిటల్ చెల్లింపులు పెరగడంతో సైబర్ నేరగాళ్లు అదును చూసి దోచుకుంటున్నారు. దాంతో సామాన్యుల దగ్గర నుంచి పెద్ద పెద్ద అధికారులు వరకూ అందరూ చాలా సులభంగా మోసపోతున్నారు. తాజాగా అలాంటి సంఘటనే చోటుచేసుకుంది.

గురుగ్రామ్‌లో ఓ రిటైర్డ్ మహిళా ఐఏఎస్ అధికారికి మద్యం హోం డెలివరీ ఇస్తామని చెప్పి సుమారు రూ.2 లక్షలు మోసం చేశారు. సుశాంత్ లోక్ నివాసి జోహ్రా ఛటర్జీ జూలై 23వ తేదీన సాయంత్రం 6 గంటల సమయంలో ఆమె పార్టీ కోసం ఏర్పాట్లలో బిజీగా ఉన్నారు. ఆ పార్టీ నిమిత్తం jagdishwineshopgurgaon.com అనే వెబ్‌సైట్‌లో మద్యం కోసం ఆర్డర్ పెట్టారు. ఆర్డర్ పెట్టిన వెంటనే ఆమెకు ఓ ఫోన్ కాల్ వచ్చింది. అవతల అడగడంతో క్రెడిట్ కార్డ్ నెంబర్, ఓటీపీ కూడా చెప్పేశారు. అంతే కార్డు నుంచి రూ.2 లక్షల మాయం అయిపోయాయి. ఈ విషయాన్ని స్వయంగా జోహ్రా ఛటర్జీనే వెల్లడించారు. దీనిపై పోలీసులకు ఫిర్యాదు చేశారు.

"నా మొబైల్ ఫోన్‌కి కాల్ వచ్చింది. పార్టీ కారణంగా అతిథులు రావడంతో కాలర్‌పై నమ్మకంతో నా క్రెడిట్ కార్డ్ నెంబర్‌తో పాటు వన్‌టైమ్ పాస్‌వర్డ్‌ని కూడా షేర్ చేశాను. తర్వాత నా క్రెడిట్ కార్డ్ ద్వారా రూ. 630 డెబిట్ అయినట్టు నాకు ఎస్ఎంఎస్ వచ్చింది. కానీ తర్వాత నా క్రెడిట్ కార్డ్ నుంచి రూ. 1,92,477.50 పోయినట్టు తెలుసుకున్నాను." అని ఆమె తన ఫిర్యాదులో పేర్కొంది. అయితే గతంలో కూడా ఈ వెబ్‌సైట్ ద్వారా పలువురు మోసపోయారని పోలీసులు తెలిపారు.

ఈ మేరకు మోసగాళ్ల మొబైల్ నెంబర్‌పై నిఘా ఉంచామని, నిందితులను వీలైనంత త్వరగా పట్టుకుంటామని సైబర్ క్రైమ్ పోలీస్ స్టేషన్ (తూర్పు) ఎస్‌హెచ్‌వో బిజేందర్ కుమార్ తెలిపారు. పోలీసులు ఐపీసీ సెక్షన్‌ 419, 420ల కింద ఇన్ఫర్మేషన్ టెక్నాలజీ చట్టంలోని సెక్షన్ 66-డీ కింద కేసు నమోదు చేశారు. కాగా ఆగస్ట్ ఒకటో తేదీనే ఇంటికి మద్యం సరఫరా చేస్తానని చెప్పి లక్ష రూపాయలకుపైగా మోసగించిన ముఠాలోని ముగ్గురు సభ్యులను పోలీసులు పట్టుకున్నారు.