ఇరవై ఐదు నిమిషాల్లో సమస్యకు పరిష్కారం చూపిన ఎమ్మెల్యే

గడప గడపకు మన ప్రభుత్వం కార్యక్రమంలో ఎమ్మెల్యే అనంత వెంకట్రామిరెడ్డి 25 నిమిషాల్లో ఓ సమస్యకు పరిష్కారం చూపారు. ఆధార్ కార్డు కావాలంటే కనీసం దరఖాస్తు చేసుకున్న రోజు నుంచి వారం రోజులైనా పడుతుంది. అలాంటిది ఎమ్మెల్యే చొరవతో కేవలం 25 నిమిషాల్లోనే కార్డు ప్రింట్ కూడా వచ్చేసింది. తమిళనాడుకు చెందిన వ్యక్తికి ఏపీలో ఆధార్ కార్డు తీసుకోవడానికి ఎన్నో ఇబ్బందులు ఎదురైతే.. ఎమ్మెల్యే క్షణాల్లోనే సమస్యను పరిష్కరించారు. దాంతో బాధితుడితో పాటు సచివాలయ సిబ్బంది కూడా కృతజ్ఞతలు తెలిపారు.

అనంతపురం ఎమ్మెల్యే అనంత వెంకట రామిరెడ్డి గడప గడపకు మన ప్రభుత్వం కార్యక్రమంలో భాగంగా సోమవారం జనశక్తి నగర్‌లో పర్యటించారు. ఈ సందర్భంగా డేవిడ్ జయరాజ్ అనే వ్యక్తి ఎమ్మెల్యేని కలిసి తన సమస్య వివరించాడు. తమిళనాడుకు చెందిన తాను ఆరేళ్ల పాటు చిత్తూరు జిల్లాలో, ఆ తర్వాత అనంతపురంలో నివాసం ఉంటున్నానని తెలిపాడు. ప్రస్తుతం తనకు ఆధార్ కార్డు కావాలంటే ఇబ్బందిగా మారిందని, ఏదో రకంగా ఆధార్ కార్డు ఇప్పించాలని ఎమ్మెల్యేకి విన్నవించాడు.

దాంతో స్పందించిన ఎమ్మెల్యే అనంత వెంకటరామిరెడ్డి ఆదేశాల మేరకు.. సచివాలయ సిబ్బంది డేవిడ్‌ జయరాజుకు సంబంధించి వివరాలను ఆధార్‌ టోల్‌ ఫ్రీ నంబర్‌ 1947కు కాల్‌ చేసి తెలియజేశారు. అక్కడి నుంచి వచ్చిన వివరాలతో కేవలం 25 నిమిషాల వ్యవధిలోనే డేవిడ్‌ జయరాజుకు ఆధార్‌ కార్డు వచ్చేలా చూశారు. అనంతరం స్థానికంగా ఉన్న సచివాలయంలో కార్డు ప్రింట్‌ తీసి గడప గడపకు మన ప్రభుత్వం జరుగుతుండగానే ఎమ్మెల్యే అనంత చేతుల మీదుగా జయరాజుకు అందజేశారు. అనంతరం అక్కడికక్కడే హౌస్‌ హోల్డ్‌ మ్యాపింగ్‌ను పూర్తి చేశారు. దీంతో ఎమ్మెల్యే అనంతకు, సచివాలయ సిబ్బందికి జయరాజు కృతజ్ఞతలు తెలియజేశారు.