‘మేము పిల్ల వెధవలం అయితే.. రోజా అవ్వనా’: జనసేన నేతల కౌంటర్

మంత్రి రోజా వర్సెస్ జనసేన నేతలు అన్నట్లుగా వార్ కొనసాగుతోంది. తాజాగా ఏపీ మంత్రి రోజా చేసిన విమర్శలకు జనసేన పార్టీ నేతలు కౌంటర్ ఇచ్చారు. ‘మేము పిల్ల వెధవలం అయితే.. రోజా అవ్వనా’అంటూ తిరుపతి జనసేన పార్టీ ఇంఛార్జ్ కిరణ్ రాయల్ సెటైర్లు పేల్చారు. ఇకపై రోజా అవ్వా అని పిలుస్తామన్నారు. అవ్వ కాబట్టే ప్రెస్ క్లబ్‌లో అందరి ముందు మేకప్ వేసుకున్నారని.. జనసేన కార్యకర్తలపై రోజా క్షమాపణ చెప్పాలని డిమాండ్ చేశారు. లేదంటే పిల్లవెధవల్లా పిల్ల చేష్టలు చేస్తామని.. ఆమెను అడ్డుకుంటామని హెచ్చరించారు.

మంత్రి రోజా కంటే ఎక్కువ చదివిన వారు, మూడు బెంజి కార్లున్న వారు జనసేన కార్యకర్తలు ఉన్నారన్నారు. ఈ పిల్ల వెధవలే రాబోయే రోజుల్లో రాజకీయాలను శాశించబోతున్నారన్నారు. అవినీతి డబ్బుతో రోజా బెంజికారు కొనలేదని నిరుపించుకోవటానికి.. మంత్రి అవకముందు ఐ.టి రిటర్నులు, మంత్రి అయ్యాక ఐ.టి. రిటర్నులను రోజా బయటపెట్టాలని కిరణ్ డిమాండ్ చేశారు. ఎంపీ గోరంట్ల మాధవ్ న్యూడ్ వీడియోలను మంత్రి రోజా సమర్థిస్తున్నారా, వ్యతిరేకిస్తున్నారో చెప్పాలన్నారు. జన సైనికులను పిల్ల వెధవలని అంటున్నారని.. వారు పెద్ద వెధవలా అని ప్రశ్నించారు. ఐదు నిమిషాలు, అర గంట , గంట , కేసినో మంత్రులు కేబినెట్‌లో ఉండడం రాష్ట్రానికి పట్టిన దౌర్భాగ్యమన్నారు.

మంత్రి రోజా జనసేన పార్టీ తీరుపై ఆగ్రహం వ్యక్తం చేశారు. తాను కారు కొనుగోలు చేయడంపై టీడీపీ, జనసేన పార్టీ నేతలు చేస్తున్న విమర్శలకు కౌంటర్ ఇచ్చారు. తాను కారు కొనుగోలు చేస్తే అది రిషికొండ గిఫ్ట్ అంటూ ప్రచారం చేస్తున్నారని.. ఈ రోజుల్లో చిన్న యాంకర్లు, చిన్న చిన్న నటులు కూడా కార్లు కొంటున్నారని గుర్తు చేశారు. తాను కారు కొనడం గొప్పేమీ కాదని.. తాను జబర్దస్త్ రెమ్యునరేషన్ ఎంత తీసుకున్నానో బ్యాంక్ స్టేట్‌మెంట్ చూస్తే తెలుస్తుంది అన్నారు. చదువురాని వారికి సమాధానం చెప్పాల్సిన పని లేదన్నారు.

ఎంపీ గోరంట్ల మాధవ్ వీడియో నిజమైందో? కాదో? తెలుసుకోకుండా టీడీపీ విమర్శలు చేయడం సరికాదన్నారు మంత్రి రోజా. ఈ వ్యవహారంపై విచారణ జరుగుతుంటే అప్పుడే అంత తొందర ఎందుకని.. తప్పుచేసినట్లు తేలితే అధినేత జగన్ వదలిపెట్టరన్నారు. మహిళలను ఎవరైనా ఇబ్బందులకు గురిచేస్తే జగన్ వదిలిపెట్టరని.. సీరియస్ యాక్షన్ తీసుకుంటారన్నారు. రాష్ట్రంలో ఎక్కడ ఏం జరిగినా టీడీపీ, జనసేన నేతలు తన నామజపం చేస్తున్నారని.. దీన్ని బట్టి తన మీద వారికి ఎంత ప్రేమ ఉందో అర్థమవుతోందన్నారు. రోజా చేసిన ఈ కామెంట్‌లకు జనసేన పార్టీ నేతలు కౌంటర్ ఇచ్చారు.