రూ.20 కోసం న్యాయపోరాటం...22 ఏళ్లకు విజయం

న్యాయం ఎప్పటికైనా గెలుస్తుంది. కాస్త ఆలస్యం కావచ్చు...కానీ అంతిమ విజయం న్యాయానిదే. అలాంటి ఓ ఘటనే యూపీలో నెలకొంది. ఉత్తరప్రదేశ్‌లోని మథురకు చెందిన ఓ వ్యక్తి కేవలం రూ.20ల కోసం 22 ఏళ్లపాటు న్యాయ పోరాటం చేశాడు. ఎట్టకేలకు గెలిచాడు. భారతీయ రైల్వేతో 1999లో మొదలైన ఈ పోరు 2022లో ముగిసింది. 1999లో తుంగనాథ్ చతుర్వేది అనే లాయర్ మథుర నుంచి మొరాదాబాద్ వెళ్లేందుకు రెండు రైల్వే టిక్కెట్లు కొనుగోలు చేశారు. అయితే టికెట్ బుకింగ్ సెంటర్‌లోని క్లర్క్ రెండు టికెట్లకు రూ.70లు అయితే.. రూ.90లు తీసుకున్నాడు. అదనంగా రూ.20లు అదనంగా వసూలు చేశాడు.

అప్పట్లో టికెట్టు ధర 35 రూపాయలు. రెండు టికెట్లు తీసుకుని.. చతుర్వేది రూ. 100 ఇచ్చాడు. అయితే స్టేషన్‌లోని క్లర్క్ రూ. 70కి బదులు మొత్తం రూ.90 వసూలు చేస్తూ.. రూ.10 మాత్రమే తిరిగి ఇచ్చాడు. దాంతో చతుర్వేది వెంటనే ఫిర్యాదు చేశారు. కానీ ఆయన అభ్యర్థనను పట్టించుకోలేదు. ఆయనకు తిరిగి డబ్బులు తిరిగి ఇవ్వలేదు. దాంతో ఆ క్లర్క్‌పై మథురలోని వినియోగదారుల కోర్టులో ఫిర్యాదు చేయాలని నిర్ణయించుకున్నారు. కన్స్యూమర్ కోర్టులో పిటిషన్ వేశారు. అప్పటి నుంచి ఇప్పటి వరకు ఆయన పోరాడుతూనే ఉన్నారు. ఆ కేసు విచారణలో చాలాసార్లు వాయిదాలు పడ్డాయి. అలా వంద విచారణలకు చతుర్వేది హాజరయ్యారు. 22 ఏళ్ల సుదీర్ఘ పోరాటం తర్వాత వినియోగదారుల కోర్టు ఆయనకు అనుకూలంగా తీర్పునిచ్చింది.

అందుకే "ఈ కేసుతో పోరాడి నేను కోల్పోయిన శక్తి, సమయానికి మీరు ధర నిర్ణయించ లేరు." అని చతుర్వేది అన్నారు. అయితే తన కేసును కొట్టివేయడానికి రైల్వే శాఖ ఎన్నోసార్లు ప్రయత్నించిందని చతుర్వేది అన్నారు. రైల్వేకు వ్యతిరేకంగా ఫిర్యాదులను రైల్వే ట్రిబ్యునల్లో మాత్రమే పరిష్కరించుకోవాలని, వినియోగదారుల కోర్టులో కాదని రైల్వే శాఖ కేసును కొట్టివేయడానికి ప్రయత్నించిందని ఆయన చెప్పారు. కానీ 2021 సుప్రీం కోర్టు తీర్పు గురించి తెలియజేసి.. వినియోగదారుల కోర్టులో విచారించవచ్చని వెల్లడించామని చతుర్వేది చెప్పారు.

ఈ సుధీర్ఘ న్యాయపోరాటంలో చతుర్వేది గెలుపొందారు. కన్స్యూమర్ కోర్టు రూ.15,000 జరిమానా చెల్లించాలని, ఏడాదికి 12 శాతం వడ్డీతో అతనికి రూ.20లను చెల్లించాలని రైల్వే శాఖకు ఆదేశించింది. ఈ మొత్తాన్ని 30 రోజుల్లోపు చెల్లించకపోతే వడ్డీ రేటు 15 శాతానికి పెంచుతామని కోర్టు పేర్కొంది. అయితే తనకు డబ్బు ముఖ్యం కాదని, న్యాయం కోసమే పోరాడానని చతుర్వేది చెప్పారు. అవినీతికి వ్యతిరేకంగా పోరాటం, కాబట్టి ఇది విలువైనదని అన్నారు. ఇన్నేళ్లు ఈ న్యాయ పోరాటం కోసం తను వెచ్చిచ్చిన కాలాన్ని, శ్రమను వెలకట్టలేరన్నారు.