వరదల ధాటికి....కల్కా-సిమ్లా హైవే కొట్టుకుపోయింది

మనదేశంలో కురుస్తున్న భారీ వర్షాల కారణంగా ప్రాణ ఆస్తి నష్టం జరిగితే..మరోవైపు నిర్మాణాలు సైతం కూలుతున్నాయి. అంతేకాదు మనదేశంలోని కాంట్రాక్టర్ల అవినీతిని కూడా ఈ వరదలు ఎత్తిచూపుతున్నాయి. భారీ వర్షాలు.. హిమాచల్ ప్రదేశ్‌ను అతలాకుతలం చేస్తున్నాయి. కొండచరియలు విరిగిపడి... రహదారులు కొట్టుకుపోతున్నాయి. హైవేలు కొట్టుకుపోతున్నాయి. దీంతో వాహనాల రాకపోకలకు అంతరాయం ఏర్పడుతుంది. ఈ బీభత్సంలో కొంతమంది గల్లంతయ్యారు. ఈ విధ్వంసం గురువారం కూడా కొనసాగింది. సోలన్‌లోని కల్కా-సిమ్లా హైవే కొట్టుకుపోయింది. ఎడతెరిపి లేని వర్షాల వల్ల కొండచరియలు విరిగిపడడంతో ఈ దుర్ఘటన చోటుచేసుకుంది. దాంతో హైవే దెబ్బతింది. దీంతో ట్రాఫిక్‌కు తీవ్ర అంతరాయం ఏర్పడింది. దీనిపై అధికారులు వెంటనే చర్యలు తీసుకున్నారు. పునరుద్ధరణ పనులు కొనసాగుతున్నాయి.

కల్కా సిమ్లా జాతీయ రహదారి-5లో నాలుగు లైన్ల సొరంగాన్ని కలిపే ఫ్లై ఓవర్ ఎప్పుడూ వాహనాలతో రద్దీగా ఉంటుంది. అయితే ఆ రహదారి దెబ్బతినడంతో వాహనాల రాకపోకలను నిలిపివేశారు. "గత రాత్రి నుంచి హిమాచల్‌ ప్రదేశ్‌లో భారీ వర్షం కురుస్తోంది. నష్టాల గురించి నివేదించడానికి అన్ని డిప్యూటీ కమిషనర్‌లను అప్రమత్తం చేశారు. కులు, మండి ప్రాంతాల్లో కూడా మౌలిక సదుపాయాలు దెబ్బతిన్నాయి." అని సీఎం జై రామ్ ఠాకూర్ చెప్పారు.

డపోత వర్షాల కారణంగా కులు జిల్లాలో పది షాపులు, మూడు వాహనాలు కొట్టుకుపోయాయి. ఈ విషయాన్ని సంబంధిత అధికారులు ధ్రువీకరించారు. మండి జిల్లాలో గురువారం ఉదయం కొండచరియలు విరిగిపడటంతో జాతీయ రహదారిని బ్లాక్ చేశారు. పాండోహ్ సమీపంలోని ఏడో మైలు దగ్గర ఈ ఘటన చోటుచేసుకుంది. దీని కారణంగా జాతీయ రహదారి-21ని పూర్తిగా బ్లాక్ చేశామని, ట్రాఫిక్‌ను కటౌలా మీదుగా మళ్లించామని మండి జిల్లా ఎమర్జెన్సీ ఆపరేషన్ సెంటర్ వెల్లడించింది. అంతేకాదు సిమ్లా జిల్లాలోని చోపాల్ తహసీల్‌లోని దియందలి నుల్లా దగ్గర మూడు చిన్న కార్లు, ఒక పికప్ వాహనం కొట్టుకుపోయాయి.

ఇదిలా ఉండగా హిమాచల్ ప్రదేశ్‌లోని కొన్ని ప్రాంతాల్లో ఆగస్ట్ 14 నుంచి 16వ తేదీ వరకు భారీ వర్షాలు కురుస్తాయని వాతావరణ శాఖ అంచనా వేసింది. ఈ మేరకు సిమ్లా, మండి, కులు ప్రాంతాల్లో ఒక మోస్తరు నుంచి విస్తారంగా వర్షాలు కురవనున్నాయి. కాంగ్రా, చంబా, సిర్మౌర్, సోలన్, బిలాస్‌పూర్, హమీర్‌పూర్, ఉనా పరిసర ప్రాంతాల్లో అతి భారీ వర్షాలు కురవనున్నట్టు వాతావరణ శాఖ అధికారులు తెలిపారు. ఆ పరిసర ప్రాంతాల్లో ఉన్న వ్యక్తులు జాగ్రత్తగా ఉండాలని అధికారులు హెచ్చరించారు. కొండచరియలు విరిగిపడటం, ఆకస్మిక వరదలు, నదుల్లో నీటి మట్టం పెరగడం వంటివి సంభవిస్తాయని తెలిపారు. ఇప్పటి వరకు కురుస్తోన్న వర్షాలకే హిమాచల్ ప్రదేశ్‌లో పరిస్థితి దారుణంగా ఉంది. మరికొన్ని రోజులు వర్షాలు ఇలాగే కొనసాగితే.. తర్వాత ఏం జరుగుతుందోననే భయాందోళన అందరిలో ఉంది.