అనుమానం రాకుండా...వ్యూహాత్మకంగా ఐటీ దాడులు

ఐటీ అధికార్లు వస్తున్నారంటే ఎవరైనా అప్రమత్తమవుతారు. ఇంట్లో ఉన్నవి గుట్టుచప్పుడు కాకుండా సర్థేస్తారు. అందుకే ఐటీ అధికార్లు వ్యూహాత్మక అడుగులు వేస్తున్నారు. ఇటీవల మహారాష్ట్రలోని జల్నాలో గతవారం ఓ వ్యాపారి ఇంట్లో ఆదాయ పన్ను శాఖ అధికారులు మెరుపు దాడులు చేపట్టిన విషయం తెలిసిందే. ఈ సోదాల్లో లెక్కల్లో చూపని రూ.390 కోట్ల విలువైన ఆస్తులను స్వాధీనం చేసుకున్నారు. అయితే, ఐటీ అధికారులు సినీ ఫక్కీలో వ్యాపారి ఇంట్లో సోదాలు నిర్వహించడం గమనార్హం. ఎవ్వరికీ అనుమానం రాకుండా పెళ్లి ఊరేగింపు మాదిరిగా వాహనాలను అలంకరించి అందులో వ్యాపారి ఇంటికి చేరుకున్నారు.

ఐటీ శాఖ ఆగస్టు 3న దాడులకు 120 వాహనాలను ఉపయోగించింది. దాడి గురించి ఎవరూ అప్రమత్తం కాకుండా వాహనాలు గ్రూపులుగా విడిపోయాయి. కొన్ని వాహనాలకు 2000లో వచ్చిన బాలీవుడ్ సూపర్ హిట్ సినిమా టైటిల్ ‘దుల్హన్ హమ్ లే జాయేంగే’ అని రాసిన బోర్డులు అతికించారు. పెళ్లి ఊరేగింపులో వరుడిని తీసుకెళ్లే కార్లలో తరచుగా ఈ బోర్డులను ఉపయోగిస్తారు. అందుకే ఇలా చేశారు. ఆదాయపు పన్ను అధికారులు, పోలీసులు కలిపి దాదాపు 250 మంది సిబ్బంది బారాత్ ముసుగులో దాడులకు బయలుదేరారు.

స్టీల్, వస్త్రాలు, రియల్ ఎస్టేట్ నిర్వహించే రెండు వ్యాపార సంస్థలకు సంబంధించిన వ్యాపారి నివాసాలు, కార్యాలయాలు, బంధువుల ఇళ్లలో సోదాలు నిర్వహించారు. పెళ్లి ఊరేగింపు ప్లాన్ బాగానే పనిచేసిందని, కోట్లాది రూపాయలు విలువైన నగలు, వజ్రాలు స్వాధీనం చేసుకున్నామని తెలిపారు. స్వాధీనం చేసుకున్న నగదును యంత్రాల సాయంతో లెక్కించేందుకు 13 గంటలు పట్టిందని పేర్కొన్నారు. ఈ ఆపరేషన్‌లో 25 సంచుల్లో నోట్ల కట్టలను ప్యాక్ చేసి స్థానిక స్టేట్ బ్యాంకుకు తీసుకెళ్లి లెక్కించారు. ఐటీ సోదాల్లో రూ.56 కోట్ల నగదు, రూ.14 కోట్ల విలువైన బంగారం, వజ్రాభరణాలను గుర్తించారు. మొత్తం 32 కిలోల బంగారం, ముత్యాలు, వజ్రాలతో పాటు ఇతర ఆస్తులకు సంబంధించిన కీలక డాక్యుమెంట్లు, డిజిటల్ డేటాను కూడా అధికారులు స్వాధీనం చేసుకున్నారు.