పేపర్ లో యడ్ ఇచ్చి మరీ...ప్రియుడు మోసాన్ని ఎండగట్టిన ప్రియురాలు

మోసం చేసే ప్రియుడికి గట్టి షాక్ ఇచ్చిందో ఓ ప్రియురాలు. ప్రియురాలి చర్యకు ప్రేమికుడి దిమ్మతిరిగింది. ఎవరైనా మోసం చేస్తే.. కొందరు కన్నీరు పెట్టుకుంటారు. మరికొందరు డిప్రెషన్‌లోకి వెళ్లిపోతారు. ఇంకొందరు తిట్టి.. కొట్టి కసి తీర్చుకుంటారు. కానీ ఓ యువతి దీనికి భిన్నంగా చేసింది. తన బాయ్‌ఫ్రెండ్‌పై ఉన్న కోపాన్ని చాలా విచిత్రంగా చూపించింది. ఏకంగా పేపర్‌లో ఫుల్ పేజీ యాడ్ ఇచ్చింది. దానిని చూసిన పాఠకులు ఆశ్చర్యపోయారు. ఈ ఘటన ఆస్ట్రేలియాలో జరిగింది. ఆ ప్రకటన కూడా చాలా విచిత్రంగా ఉంది. చేసిన ఘనకార్యాన్ని ఎత్తిచూపుతూ..చెప్పకనే చెబుతూ తన బాయ్‌ఫ్రెండ్ చేసిన మోసాన్ని అందరికి తెలియజేసింది.

ఆ పేపర్ ప్రకటనలో "నువ్వు నీ గర్ల్ ఫ్రెండ్‌తో సంతోషంగా ఉన్నావని నేను ఆశిస్తున్నాను. ఇప్పుడు నువ్వు ఎంత మోసగాడివో పట్టణం మొత్తం తెలుసుకుంటారు. ఇట్లు జెన్నీ.." అని పేర్కొంది. అంతేకాదు ఈ యాడ్‌ను క్రెడిట్ కార్డు ఉపయోగించి కొనుగోలు చేశానని పేర్కొంది. దీంతో ఆ నగరంలోమ హాట్‌టాపిక్ అయింది. ఆ స్టీవ్, జెన్నీలు ఎవరో తెలుసుకోవాలని ప్రజలు ఆసక్తి చూపుతున్నారు. ఆ యాడ్ గురించి మరింత తెలుసుకోవడానికి ఆ పత్రిక యాజమాన్యానికి మెసెజ్‌లు పంపుతున్నారంట.

అయితే స్టీవ్, జెన్నీల గురించి ప్రజల నుంచి మెసెజ్‌లు రావడంతో ఆ వార్తా పత్రిక వివరణ ఇవ్వక తప్పలేదు. స్టీవ్ ఎవరో మాకు తెలియదని, జెన్నీ గురించి కూడా చెప్పలేమని వార్తాపత్రిక యాజమాన్యం వెల్లడించింది. "స్టీవ్ ఎవరో మాకు తెలియదు.. కానీ స్పష్టంగా అతను చాలా చెడ్డవాడు. మేము జెన్నీ గురించి ఎలాంటి వివరాలను వెల్లడించలేం." అని పేర్కొన్నారు. ఇక జెన్నీ ఇచ్చిన యాడ్ సోషల్ మీడియాలో కూడా వైరల్ అయింది. దానిపై నెటిజన్లు తమదైన శైలీలో కామెంట్లు పెడుతున్నారు. దాదాపు అందరూ జెన్నీకి మద్దతు ఇస్తున్నారు. ఒకరు తాను ఎవరితో స్నేహాం చేయాలనుకుంటున్న అలాంటి వ్యక్తే జెన్నీ అని మెసెజ్ పెట్టగా.. జెన్నీ నా కొత్త ఇష్టమైన వ్యక్తి అని కామెంట్ పెట్టారు. అలా జెన్సీ అందరి హృదయాలను దోచుకుంది.