వర్మ సినిమా పేరు మార్చాల్సిందేనంటున్న బిజెపి
cinema | Suryaa Desk | Published : Wed, Oct 30, 2019, 12:54 AM
ఇటీవలి ఎపి అసెంబ్లీ ఎన్నికల్లో తెలుగుదేశం పార్టీ ఘోర ఓటమి, అనంతర పరిణామాల నేపథ్యంలో రామ్గోపాల్ వర్మ కమ్మ రాజ్యంలో కడప రెడ్లు అంటూ మరో వివాదాస్పద చిత్రాన్ని రూపొందించి విడుదలకు సిద్దం చేసాడు. దీపావళి సందర్భంగా విడుదల చేసిన ట్రైలర్ రాజకీయ వర్గాలలో ఆటం బాంబు లా పేలింది. జగన్, చంద్రబాబు, లోకేష్, పవన్ కళ్యాణ్, కేఏ పాల్ను పోలిన క్యారెక్టర్లు కనిపించేలా రూపొందించిన ట్రైలర్ పెద్ద దుమారమే రేపుతోంది ఇప్పుడు.
కాగా ఈ చిత్ర ట్రైలర్ చూస్తేనే కులాల మధ్య చిచ్చు పెట్టేలా ఉందని ఇప్పటికే కాంగ్రెస్ పార్టీ నేతలు అనంతపురంలో పోలీసులకు కూడా ఫిర్యాదు చేయగా, తాజాగా బీజేపీ నేతలు సైతం కమ్మరాజ్యంలో కడపరెడ్లు టైటిల్ తక్షణమే మార్చాలంటూ సెన్సార్ బోర్డుకు ఫిర్యాదు చేసింది. ఈ చిత్ర టైటిల్ మార్చిన తర్వాతే సినిమా విడుదలకు అనుమతించాలని బీజేపీ యువమోర్చా అధ్యక్షుడు రమేష్ నాయుడు మీడియాకు తెలిపారు. రామ్గోపాల్ వర్మ కేవలం సంచలనాలు, ఆదాయం కోసమే ఇష్టాను సారం సినిమాలు తీస్తున్నట్టు కనిపిస్తోందని,ఇందులో ప్రజలు, రాజకీయ పక్షాల మనోభావాలను ఆయన గౌరవించక పోవటం పల్ల అభ్యంతరాలు వ్యక్తం చేశారు. సినిమా పేరు మార్చకపోతే ఉద్యమం చేస్తామని రమేష్ హెచ్చరించారు. దీనిపై రామ్గోపాల్ వర్మ ఎలా స్పందిస్తారో వేచి చూడాలి మరి!
|
|