కెనడాలో వైద్యం అందక భారతీయుడి మృతి

విదేశాల్లో మెరుగైన వైద్యం అందుతుందని ఆశపడి వెళ్లే భారతీయులకు కెనడా ఆరోగ్య వ్యవస్థ చేదు అనుభవాలనే మిగిలుస్తోంది. తాజాగా తీవ్రమైన ఛాతి నొప్పితో ఆసుపత్రికి వెళ్లిన 44 ఏళ్ల భారత సంతతి వ్యక్తి ప్రశాంత్ శ్రీకుమార్.. సరైన సమయంలో చికిత్స అందక ప్రాణాలు కోల్పోయారు. ఎమర్జెన్సీ వార్డులో సుమారు ఎనిమిది గంటల పాటు నొప్పితో విలవిలలాడినా.. అక్కడి సిబ్బంది అస్సలే పట్టించుకోలేదు. దీంతో ఆయన కన్నతండ్రి ముందే నొప్పి భరించలేక అక్కడికక్కడే కుప్పకూలి చనిపోయారు.

నొప్పితో విలవిల.. పట్టించుకోని సిబ్బంది

డిసెంబర్ 22వ తేదీన ప్రశాంత్ శ్రీకుమార్ తన పనిలో ఉండగా అకస్మాత్తుగా తీవ్రమైన ఛాతి నొప్పి రావడంతో.. ఒక క్లయింట్ సహాయంతో ఎడ్మంటన్‌లోని 'గ్రే నన్స్ కమ్యూనిటీ హాస్పిటల్'కు చేరుకున్నారు. సమాచారం అందుకున్న ప్రశాంత్ తండ్రి కుమార్‌ శ్రీకుమార్ కూడా వెంటనే ఆసుపత్రికి వెళ్లారు. "నాన్న.. నేను ఈ నొప్పిని అస్సలు భరించలేకపోతున్నాను" అని ప్రశాంత్ తన తండ్రి దగ్గర ఆవేదన వ్యక్తం చేశారు. నేను చనిపోయేలా ఉన్నాను కాస్త నన్ను చూడమంటూ సిబ్బందికి చెప్పినా వారు వినలేదు. ఏమీ కాదని చెబుతూనే.. ఆసుపత్రి సిబ్బంది ప్రాథమికంగా ఈసీజీ తీశారు.

అందులో పెద్దగా ఆందోళన చెందాల్సిన విషయం ఏమీ లేదని చెప్పి వారిని మళ్లీ వెయిటింగ్ రూమ్‌లోనే కూర్చోబెట్టారు. గంటలు గడుస్తున్నా నొప్పి తగ్గకపోగా.. బీపీ విపరీతంగా పెరిగిపోయింది. దీంతో సిబ్బంది నొప్పి నివారణ కోసం కేవలం 'టైలెనాల్' మందు ఇచ్చి చేతులు దులుపుకున్నారు. దాదాపు ఎనిమిది గంటల సుదీర్ఘ నిరీక్షణ తర్వాత చివరకు అతన్ని చికిత్స గదిలోకి పిలిచారు. కానీ అప్పటికే జరగాల్సిన నష్టం జరిగిపోయింది.

తండ్రి ముందే గుండె ఆగిపోయింది..

ట్రీట్‌మెంట్ రూమ్‌లోకి వెళ్లిన కేవలం 10 సెకన్లకే ప్రశాంత్ తన తండ్రి వైపు చూసి.. ఛాతిపై చేయి వేసుకుని ఒక్కసారిగా కింద పడిపోయారు. నర్సులు సహాయం కోసం కేకలు వేసి ప్రాణాలు కాపాడేందుకు ప్రయత్నించినప్పటికీ ఫలితం లేకపోయింది. తీవ్రమైన గుండెపోటుతో ప్రశాంత్ అక్కడికక్కడే కన్నుమూశారు. ప్రశాంత్ మృతితో అతని భార్య, ముగ్గురు చిన్న పిల్లలు (వయస్సు 3, 10, 14 ఏళ్లు) అనాథలుగా మారారు.

కెనడా ఆరోగ్య వ్యవస్థపై విమర్శలు

ఈ ఘటనపై ఆసుపత్రి యాజమాన్యం 'కోవెనెంట్ హెల్త్' స్పందిస్తూ.. కుటుంబ సభ్యులకు సానుభూతి తెలిపింది. ప్రస్తుతం ఈ కేసుపై చీఫ్ మెడికల్ ఎగ్జామినర్ కార్యాలయం విచారణ జరుపుతోందని పేర్కొంది. అయితే అత్యవసర విభాగంలో 8 గంటల పాటు బాధితుడిని నిలబెట్టడంపై తీవ్ర విమర్శలు వ్యక్తం అవుతున్నాయి. కెనడాలో వెయిటింగ్ టైమ్స్ పెరిగిపోవడం సామాన్యుల ప్రాణాలకు ముప్పుగా మారుతోందని ఈ ఘటన మరోసారి నిరూపించింది.