2 సెకన్లలోనే 700 KMPH వేగంతో పరుగులు.. బుల్లెట్ రైలు వరల్డ్ రికార్డ్

ప్రపంచంలోనే టెక్నాలజీ రంగంలో దూసుకెళ్తున్న చైనా.. మరో మైలురాయిని అధిగమించింది. ధ్వని వేగాన్ని సవాల్ చేసే రీతిలో అతి తక్కువ సమయంలోనే అసాధారణ వేగాన్ని అందుకుని.. చైనా మాగ్లెవ్ రైలు ప్రపంచ దేశాలను విస్మయానికి గురిచేసింది. దీంతో రవాణా రంగంలో చైనా మరో అద్భుతాన్ని ఆవిష్కరించింది. కేవలం రెండు సెకన్లలోనే గంటకు 700 కిలోమీటర్ల వేగాన్ని అందుకుని.. చైనా మాగ్లెవ్ టెక్నాలజీలో ప్రపంచ రికార్డును బద్ధలు కొట్టింది. చైనాకు చెందిన నేషనల్ యూనివర్శిటీ ఆఫ్ డిఫెన్స్ టెక్నాలజీ పరిశోధకులు నిర్వహించిన.. ఈ సూపర్ కండక్టింగ్ ఎలక్ట్రిక్ మాగ్లెవ్ టెస్ట్ ఇప్పుడు గ్లోబల్ బెంచ్‌మార్క్‌గా నిలిచింది.

అసాధారణ ప్రయోగం

ఈ ప్రయోగంలో భాగంగా 400 మీటర్ల పొడవైన మాగ్నెటిక్ లెవిటేషన్ టెస్ట్ ట్రాక్‌పై ఒక టన్ను బరువు ఉన్న మాగ్లెవ్‌ను పరిశోధకులు ప్రయోగించారు. ఈ టెస్ట్‌లో మాగ్లెవ్.. అసాధారణ రీతిలో అతి తక్కువ సమయంలోనే గంటకు 700 కిలోమీటర్ల వేగాన్ని అందుకోవడమే కాకుండా.. ఆ మొత్తం దూరం చేరిన తర్వాత అంతే వేగంగా సురక్షితంగా ఆగడం విశేషం. అల్ట్రా హై స్పీడ్ ఎలక్ట్రోమాగ్నెటిక్ ప్రొపల్షన్, హై ఫీల్డ్ సూపర్ కండక్టింగ్ అయస్కాంతాల వంటి సంక్లిష్ట టెక్నికల్ సవాళ్లను అధిగమించి ఈ ఘనత సాధించినట్లు తెలిపారు.

విమానాల కంటే ఎక్కువ వేగం

ఈ మాగ్లెవ్ టెక్నాలజీ.. రానున్న కాలంలో ప్రయాణాల రూపురేఖలను పూర్తిగా మార్చేయనుందని నిపుణులు అంచనా వేస్తున్నారు. వాక్యూమ్ సీల్డ్ ట్యూబ్‌ల ద్వారా నగరాల మధ్య నిమిషాల్లో ప్రయాణించే హైపర్‌లూప్ రైలు కల ఈ మాగ్లెవ్‌తో సాకారం కానుందని పేర్కొంటున్నారు. రాకెట్లు, ఎయిర్‌క్రాఫ్ట్‌ల లాంచ్‌కు ఈ ఎలక్ట్రోమాగ్నెటిక్ టెక్నాలజీని వాడటం ద్వారా ఇంధన ఖర్చును భారీగా తగ్గించవచ్చని చెబుతున్నారు.

ఇక ఈ విధానంలో మాగ్లెవ్‌కు చక్రాలు ఉండవు. కేవలం అయస్కాంత శక్తి ద్వారా అది పట్టాలకు కొద్దిగా పైన గాలిలో తేలుతూ పరుగులు తీస్తుంది. దీనివల్ల ఘర్షణ లేక వేగం ఒక్కసారిగా భారీగా పెరుగుతుంది.

ఈ విజయం కోసం గత 10 ఏళ్లుగా చైనా నిరంతరం శ్రమిస్తోంది. ఈ ఏడాది జనవరిలోనే గంటకు 648 కిలోమీటర్ల వేగాన్ని సాధించిన ఈ పరిశోధకుల బృందం.. ఇప్పుడు తమ రికార్డును తామే అధిగమించి సరికొత్త రికార్డును సృష్టించింది. ప్రస్తుతం షాన్‌క్సీ ప్రావిన్స్‌లో గంటకు ఏకంగా 1000 కిలోమీటర్ల వేగమే లక్ష్యంగా చైనా మరో భారీ ప్రాజెక్టుపై పని చేస్తోంది. ఇక అది కూడా సక్సెస్ అయితే.. నేలపై ప్రయాణించే వాహనాలు విమానాల కంటే వేగంగా దూసుకుపోతాయని నిపుణులు అభిప్రాయపడుతున్నారు.