భరత్ అనే నేను ‘లీడర్’ని కాను
cinema | | Published : Wed, Dec 13, 2017, 09:11 AM
మహేష్ బాబు హీరోగా కొరటాల శివ దర్శకత్వంలో తెరకెక్కుతోన్న చిత్రం 'భరత్ అనే నేను'. ప్రస్తుత ఈ సినిమా చిత్రీకరణ దశలో ఉంది. రీసెంట్గా హైదరాబాద్లో అసెంబ్లీ సెట్ వేసి కొన్ని ముఖ్య సన్నివేశాలను చిత్రీకరించారు. అయితే ఇప్పుడు ఆ సన్నివేశాలను మార్చి చిత్రీకరించాలని నిర్ణయించుకున్నాడట దర్శకుడు కొరటాల శివ. గతంలో శేఖర్ కమ్ముల దర్శకత్వంలో 'లీడర్' సినిమా తెరకెక్కిన సంగతి తెలిసిందే. ఈ సినిమాలో హీరో ముఖ్యమంత్రి పాత్రలో కనిపిస్తాడు. తండ్రి వారసత్వ రాజకీయాన్ని కొనసాగించే పాత్రలో కనిపిస్తాడు.
సరిగ్గా మహేష్ బాబు పాత్ర కూడా ఈ తరహాలోనే ఉంటుందని సమాచారం. సినిమాలో మహేష్ తండ్రి ముఖ్యమంత్రి కావడంతో అతడికి వారసుగా మహేష్ ఎంట్రీ ఇస్తాడని తెలుస్తోంది. సినిమా చిత్రీకరించిన తరువాత ఈ సినిమాకు లీడర్ సినిమాకు పోలికలు ఉన్నాయనే కామెంట్స్ చిత్రబృందం నుండి వినిపించడంతో దర్శకుడు కొరటాల శివ వాటిని మార్చాలని భావిస్తున్నాడట. సన్నివేశాలను మరింత బలంగా, కొత్తగా తీర్చిదిద్దుతున్నాడని సమాచారం.
ఓ పక్క సినిమాటోగ్రాఫర్ తప్పుకోవడం, ఇప్పుడేమో మళ్ళీ సన్నివేశాలు మార్చి చిత్రీకరించడం.. ఈ కారణాల వలన సినిమా అనుకున్న సమయానికి ‘భరత్ అనే నేను’ రాదేమో అనే సందేహాలు కలుగుతున్నాయి.
|
|