వేషం చిన్నది…ప్రతిఫలం పెద్దది..

పర భాష నటీనటులకు తెలుగు సినమా కాసుల వర్షం కురిస్తోంది. సొంత భాషలో తీసుకునే దానికంటే తెలుగు సినిమాల్లో నటిస్తున్నందుకు అత్యధిక పారితోషికం డిమాండ్‌ చేస్తున్నారు. వారు అడిగినంతా మన నిర్మాతలు ఇవ్వడం ఆశ్చర్యం కలిగిస్తోంది. డబ్బింగ్‌ లేదా శాటిలైట్‌ హక్కుల కోసమే భారీ మొత్తం చెల్లిస్తున్నామని నిర్మాతలు అంగీకరిస్తున్నారు. తెలుగు ఆర్టిస్టులకు వేషాలు ఇచ్చేందుకు సంశయించే దర్శక, నిర్మాతలు ఇతర భాషల నటుల కోసం మాత్రం వెంపర్లాడుతున్నారు. బతిమాలి డేట్స్‌ తెచ్చుకుంటున్నారు. ఈ పరిణామం తెలుగునే నమ్ముకున్న ఆర్టిస్టులకు బాధకలిగిస్తోంది. 

గడచిన ఏడేళ్ళుగా అనేక తెలుగు సినిమాల్లో కనిపిస్తున్న నటుడు సత్యరాజ్‌. తమిళ్‌లో హీరోగా నటించి, ఆ తర్వాత క్యారెక్టర్‌ నటునిగా ఓ మోస్తారు డిమాండ్‌ ఉన్న ఈయనకు తెలుగులో మాత్రం మంచి క్రేజ్‌ ఉంది. అనేక చిత్రాల్లో ఆయన నటిస్తున్నారు. బాహుబలి కంటే ముందే చాలా తెలుగు చిత్రాల్లో నటించారు. కట్టప్ప పాత్ర తర్వాత మరింత పుంచుకున్నారు. ప్రస్తుతం సమాచారం ప్రకారం ఒక్కో సినిమాకు ఆయన తీసుకుంటున్న పారితోషికం రెండున్నర కోట్లు. ఇది నిజం. క్యారెక్టర్‌ నటునికి ఇంత ఇవ్వడం అంటే ఆశ్చర్యం కలిగిస్తుంది కానీ నిజం అని అంటున్నాయి టాలీవుడ్‌ వర్గాలు. సత్యరాజ్‌ను తీసుకోవడం వల్ల ఉపయోగం ఏమిటీ? అంటే తమిళ్‌ డబ్బింగ్‌కు ఉపయోగం. కానీ కథలో క్యారెక్టర్‌కు ఆయన ఏమేరకు బలం చేకూర్చుతారనేది ఎవరూ చెప్పడం లేదు. సహజంగా స్టార్స్‌ నటించే చిత్రాల ప్రచారంలో ఆయా స్టార్స్‌ బొమ్మలు మాత్రమే ముద్రిస్తారు. కానీ సత్యరాజ్‌ నటిస్తున్న సినిమా ప్రచారంలో హీరోతో పాటు ఆయన కూడా కనిపిస్తున్నారు. తెలుగులో హీరోగా నటించి క్యారెక్టర్‌ నటునిగా మారిన జగపతిబాబు విషయంలో మాత్రం టాలీవుడ్‌ మరో విధంగా వ్యవహరిస్తోందని అంటున్నారు. సినిమాల ప్రచారంలో ఆయన బొమ్మ కనిపించదు. సత్యరాజ్‌తో పోల్చుకుంటే జగపతిబాబు అందుకుంటున్న పారితోషికం తక్కువే. జగపతిబాబు ఇతర బాషల్లో నటిస్తున్నారు. అక్కడ కూడా ఆయనకు ఇస్తున్నది తక్కువే అని అంటారు. మన టాలీవుడ్‌ వ్యవహార శైలి చాలా చిత్రంగా ఉంటుంది.