‘విజయ్ దేవరకొండ’ ప్రత్యేకమైన నటుడు

క్రియేటివ్‌ కమర్షియల్స్‌ సంస్థపై అనేక విజయవంతమైన చిత్రాలు నిర్మించారు కేఎస్‌ రామారావు. విజయ్‌ దేవరకొండ హీరోగా ఆయన నిర్మించిన తాజా చిత్రం వరల్డ్‌ ఫేమస్‌ లవర్‌. క్రాంతి మాధవ్‌ దర్శకుడు. ప్రేమికుల దినోత్సవం రోజున ఈ సినిమా ప్రేక్షకుల ముందుకొస్తోంది. ఈ సందర్భంగా వరల్డ్‌ ఫేమస్‌ లవర్‌ చిత్ర విశేషాలు కేఎస్‌ రామారావు వివరిస్తూ….గతేడాది అక్టోబర్‌లో సినిమా మొదలుపెట్టాం. చిత్రీకరణ, ప్రచార కార్యక్రమాలు కొంత ఆలస్యమయ్యాయి. ఈ కథ పెద్దది, విభిన్నమైనది కాబట్టి ఆలస్య మవుతుందని  ఊహించాం. మా  చిత్రంలో నలుగురు నాయికలు పనిచేశారు. వాళ్లకు  ఇతర సినిమాలో డేట్స్‌  అనుకున్నట్లు కుదరలేదు. వీళ్ల డేట్స్‌ లేక  విజయ్‌ దేవరకొండ  కొన్నాళ్లు  ఖాళీగా  ఉండాల్సివచ్చింది. ఆ  సమయంలో  ఆయన అప్పటికున్న  సినిమాలు  పూర్తి చేశాడు. ప్రచార కార్యక్రమాలు కొద్దిగా నెమ్మదిగా ప్రారంభిద్దాం అనుకున్నాం కానీ చాలా ఆలస్యమై పోయింది. మా సినిమాను డిసెంబర్‌ జనవరిలోనే విడుదల చేయొచ్చు కానీ ఈ కథకు, అప్పటి ప్రేక్షకుల మూడ్‌కు సరిపోవడం లేదు. అందుకే దీనికి వేరే సమయం ఇచ్చి విడుదల చేద్దామని ప్రేమికుల దినోత్సవం రోజున మీ ముందుకు తీసుకొస్తున్నాం. నేను అనేక మంది స్టార్‌ హీరోలతో సినిమాలు నిర్మించాను. కొద్ది మంది నటులు మాత్రమే ప్రత్యేకమైన తరహా కలిగి ఉంటారు. రవితేజలా విజయ్‌ దేవరకొండ ప్రత్యేకమైన నటుడు. మిగతా వాళ్లకు భిన్నంగా ఉంటారు. పరిశ్రమలో చాలా కొద్దిమంది మాత్రమే అలాంటి వాళ్లుంటారు. పెళ్లి చూపులు సినిమా చూశాక, విజయ్‌ దేవరకొండతో సినిమా చేయాలని అనుకున్నా. క్రాంతి మాధవ్‌ మంచి కథను సిద్ధం చేసి హీరోను ఒప్పించారు. ఒక్కోహీరోకు ఒక్కో తరహా కథ నప్పుతుంది. ఇది విజయ్‌ దేవరకొండకు సరిపోయే కథ. ఇవాళ్టి యువతరం మెచ్చేలా ఉంటుంది. అదే సమయంలో క్రియేటివ్‌ కమర్షియల్స్‌ సంస్థ సినిమాలు ఎలా ఉంటాయో ఆ హద్దుల్లోనే ఉంటుంది. క్రాంతి మాధవ్‌ గతంలో మళ్లిd మళ్లిd ఇది రాని రోజు అనే ప్రేమ కథను తెరకెక్కించాడు. అది కుటుంబ మంతా చూసేలా ఉంటుంది. ఇదీ అలాగే. విజయ్‌ దేవరకొండ ప్రతి నిర్మాత సినిమా చేయాలని అనుకునే హీరో. ఈ సినిమా కథ గురించి నేనేమీ చెప్పను. ప్రేక్షకు లు చాలా మేధావులు. పోస్టర్‌ చూసే ఈ కథేంటో ఊహించుకోగలరు. తెరపై చూస్తేనే బాగుంటుంది. ఏ విషయం చెప్పినా కథలో అందం పోతుంది. నిర్మాతల బాగు కోసం గిల్డ్‌ అనేది ఉంది. అయితే అందరికీ ఇందులో న్యాయం జరగడం లేదు. కొందరికి మాత్రం లబ్ది చేకూరుతోంది. క్యూబ్‌, యూఎఫ్‌వో వంటి డిజిటల్‌ కంటెంట్‌ ప్రొవైడర్స్‌ వల్ల నిర్మాతలకు నష్టం కలుగుతోంది. నిర్మాతకు రాని డబ్బులు వీళ్లకు వస్తున్నాయి. ఈ విషయంలో నిర్మాతలు కలిసి ఐక్యంగా నిర్ణయం తీసుకోవాలి. సినిమా పంపిణీ వ్యవస్థ కూడా కొద్దిమంది చేతుల్లో ఉండిపోయింది. వాళ్లు ఎక్కువ సినిమాలు విడుదల చేస్తున్నారు కాబట్టి థియేటర్‌లు తమ ఆధిపత్యంలో ఉంచుకున్నారు. దీని వల్ల చాలా చిన్న సినిమాల నిర్మాతలు ఇబ్బందులు పడుతున్నారు. త్వరలో నాని, మారుతి కాంబినేషన్‌లో ఓ సినిమా అనుకుంటున్నాం. చర్చలు జరుగుతున్నాయి. అన్నారు.