మన వాళ్లకు కథలో భావోద్వేగాలు ఉండాలి : అశ్వథ్థామ దర్శకుడు రమణతేజ

అశ్వథ్థామ చిత్రంతో తెలుగు చిత్ర పరిశ్రమలోకి దర్శకుడిగా అడుగుపెడుతున్నాడు రమణతేజ. నాగశౌర్య..మెహరీన్ జంటగా నటించిన ఈ చిత్రాన్ని ఐరా క్రియేషన్స్ నిర్మిస్తోంది. యాక్షన్ థ్రిల్లర్ కథతో తెరకెక్కిన అశ్వథ్థామ ఎలా ఉండనుందో ఈ యువ దర్శకుడి మాటల్లో వింటే.. చిత్తూరు జిల్లా  మదనపల్లి మా సొంతూరు. అక్కడే విద్యాభ్యాసం జరిగింది. ఉన్నత విద్యను చెన్నైలో అభ్యసించాను. ఆ తర్వాత చదువుల కోసం అమెరికా వెళ్లి, అక్కడే స్క్రీన్‌ రైటింగ్‌లో కోర్సు పూర్తి చేశాను. ఆ తర్వాత టెడ్‌ 2 లాంటి కొన్ని హాలీవుడ్‌ చిత్రాలకు పనిచేసే అవకాశం వచ్చింది. సహాయ దర్శకుడిగా పనిచేశాను. ఆ తర్వాత తెలుగులో సినిమా చేయాలని ప్రయత్నాలు ప్రారంభించాను. ఇంట్లో ఎక్కువగా సినిమాలకు వెళ్లేవాళ్లం. ఆ సినిమా చూసొచ్చిన తర్వాత దాని గురించి మాట్లాడుకునేవాళ్లం. నేను చిరంజీవి గారి అభిమానిని. అలా సినిమాలంటే ఇష్టం పెరుగుతూ వచ్చింది. నాకు కథ కంటే కథనం రాయడం ఇష్టం. స్క్రీన్‌ రైటింగ్‌లో పట్టు ఉంది. కథలు అంతగా రాయలేను. కథ పూర్తయ్యాకే నా పని మొదలవుతుంది. నాగశౌర్య రెండేళ్లు శ్రమించి ఈ కథను రాశారు. ఆయన కథకు న్యాయం చేశాననే అనుకుంటున్నా. కథనంలో రాక్షసన్‌ లాంటి తమిళ చిత్రాల స్ఫూర్తి తీసుకున్నాం. శ్రీచరణ్‌ పాకాల మంచి పాటలు అందించారు. థ్రిల్లర్‌ సినిమాల నేపథ్య సంగీతంలో జిబ్రాన్‌కు బాగా పేరుంది. ఆయనను తీసుకున్నాం. అంతే గానీ శ్రీచరణ్‌తో ఎలాంటి విబేధాలు లేవు. మహిళా భద్రత గురించి ఈ సినిమాలో ఎలాం టి సందేశాలు ఇవ్వలేదు. ఇటీవల జరిగిన ఘటనలు చేర్చలేదు. అంతకుముందే కథ సిద్ధమైంది. మహిళలపై జరుగుతున్న దాడుల గురించి మాత్రమే ప్రస్తావించాం. హాలీవుడ్‌ చిత్రాల తరహా వేరు. మన చిత్రాల సంప్రదాయం వేరు. మన సినిమాలో హీరోకు ప్రాధాన్య ముంటుంది. పాటలుంటాయి. నేను ఈ కొత్తదనాన్ని ఆస్వాదించాను. మన వాళ్లకు కథలో భావోద్వేగాలు ఉండాలి. అవి బాగుంటే సినిమా చూస్తారు. దర్శకుడు క్రిష్‌ అంటే ఇష్టం. ఆయన రూపొందించిన కృష్ణం వందే జగద్గురుమ్‌ సినిమా ఎన్నోసార్లు చూశా. నాకూ అలాంటి నాటకీయత ఉన్న కథను తెరకెక్కించాలని ఉంది. నాగశౌర్య నాకు ఒక సోదరుడు అనుకుంటా. అంత బాగా మా మధ్య అనుబంధం పెరిగింది.