జర్నలిస్టు పాత్రలో సమంత ?

కొత్త సినిమాను అంగీకరించినట్లు సమంత అక్కినేని తాజాగా ప్రకటించింది. కానీ సినిమాలో పాత్రల గురించి మాత్రం ప్రస్తావించలేదు. కన్నడలో సూపర్ హిట్ అయిన ‘యూటర్న్’ సినిమాను తెలుగులో రీమేక్ చేస్తున్నారు. ఈ సినిమాలో సమంత లీడ్ రోల్ పోసిస్తోంది. తెలుగు, తమిళంలో ఏక కాలంలో ఈ చిత్రాన్ని తెరకెక్కించనున్నారు. కన్నడ వర్షన్‌ను తెరకెక్కించిన పవన్ కుమార్ ఇప్పుడు రీమేక్‌కూ దర్శకత్వం వహిస్తున్నారు. ఈ ప్రాజెక్టు ఫిబ్రవరిలో పట్టాలెక్కనుంది. ఇది ఓ జర్నలిస్టు కథ. ఓ ఫ్లైఓవర్‌పై సంభవించిన కొన్ని మరణాలపై ఇన్వెస్టిగేషన్ చేసే జర్నలిస్టు పాత్రలో సమంత కనిపించనుంది.

ఇదిలా ఉంటే.. ఈ రీమేక్‌లో సమంత బాయ్‌ఫ్రెండ్ పాత్రను ‘అందాల రాక్షసి’ ఫేమ్ రాహుల్ రవీంద్రన్ పోషించనున్నాడు. మరో ఆసక్తికర విషయమేమిటంటే.. ఇటీవల కాలంలో తెలుగులో స్టైలిష్ విలన్‌గా గుర్తింపు ఆకట్టుకుంటున్న ఆది పినిశెట్టి ఈ సినిమాలో పోలీస్‌గా కనిపించనున్నాడు. ఈ విషయాన్ని దర్శకుడు పవన్ కుమార్ స్వయంగా ప్రకటించారు. ఆది, సమంత ఇప్పటికే ‘రంగస్థలం’లో కలసి నటిస్తున్నారు. ఇప్పుడు మరోసారి వీరిద్దరూ స్క్రీన్‌ను పంచుకోనున్నారు.

మరోవైపు తమిళ స్టార్ హీరో సూర్య, సీనియర్ నటి భూమికా చావ్లాలు కూడా ఈ చిత్రంలో కీలక పాత్రలు పోషించనున్నట్లు సమాచారం. ప్రస్తుతానికి చిత్ర యూనిట్ వీరిద్దరితో చర్చలు జరుపుతోందట. ఇదే గనక ఓకే అయితే.. ఇదో భారీ చిత్రం అవ్వడం ఖాయం. తెలుగు, తమిళ భాషల్లో ఈ సినిమాను శ్రీనివాసా సిల్వర్‌స్క్రీన్స్ సంస్థ నిర్మిస్తోంది. కాగా, ఈ ఏడాది సమంత బిజీబిజీగానే గడుపుతోంది. నాగచైతన్యతో పెళ్లి అనంతరం ‘రంగస్థలం’, ‘మహానటి’ షూటింగుల్లో సమంత పాల్గొంటోంది. మరోవైపు విశాల్‌తో కలసి నటించిన ‘అభిమన్యుడు’ విడుదలకు సిద్ధమవుతోంది