కొత్త అవతారంలో నేచురల్ స్టార్ నాని..

నాని మొదటి నుంచీ కూడా సాదాసీదా సినిమాలు చేయలేదు. తను నటించిన ఏ సినిమా చూసినా అందులో ఏదో కాస్త కొత్తదనమైనా కనపడుతుంది. అతని నటనలో కూడా సమ్ థింగ్ స్పెషల్ కనిపిస్తుంది. అందుకే, వెరైటీ పాత్రలు, కథలతో నూతన దర్శకులు వచ్చినా, నచ్చితే కనుక వెంటనే ఓకే చెప్పేస్తాడు. అంతేకాదు నాని కొత్త కథలతో పాటు కొత్త దర్శకులని కూడా ప్రోత్సహిస్తూ ఉంటాడు. అందులో భాగంగా ఆయన తాజాగా హిట్ సినిమాలో శైలేష్ కొలనుకు అవకాశం ఇచ్చాడు. మరోవైపు ఆయన కొత్త దర్శకుల దర్శకత్వంలో సినిమాలు చేస్తూ అక్కడ కూడా అదరగొడుతున్నాడు. ఆయన ప్రస్తుతంశివ నిర్వాణతో చేస్తున్న 'టక్ జగదీష్' సినిమా చేస్తున్నా మినహా ఆ తర్వాత చేయబోయే చిత్రాలన్నీ కొత్త డైరెక్టర్లతో చేస్తున్నవే. వీటిలో రాహుల్ సంకృత్యాన్, వివేక్ ఆత్రేయ చిత్రాలతో పాటు సుకుమార్ శిష్యుడు శ్రీకాంత్‌తో కూడా ఓ కొత్త చిత్రం చేయనున్నాడు. ఈ సినిమాని సుధాకర్ చెరకూరి నిర్మించనున్నారు. వచ్చే ఏడాది సెట్స్‌పైకి వెళ్లనున్న ఈ చిత్రం గురించి ఓ ఆసక్తికర విషయం బయటకొచ్చింది. ఈ సినిమాలో నాని తొలిసారిగా తెలంగాణ భాషలో మాట్లాడనున్నాడట. అలాగే ఇందులో నాని స్టైల్ కూడా తెలంగాణ ప్రాంతానికి చెందినదిగా ఉంటుందని తెలుస్తోంది. ఈ సినిమా తెలంగాణా నేపథ్యంలో సాగే రస్టిక్ లవ్ స్టోరీ అని ఉండనుందని సమాచారం. ఇప్పటికే నాని ఈ కథ విని ఇంప్రెస్ అయ్యారట. ఈ సినిమా కథ తెలంగాణ గ్రామీణ నేపథ్యంలో సాగే సినిమా కావటంతో నాని కచ్చితంగా తెలంగాణ యాసలోనే మాట్లాడాల్సి ఉంటుందట. గతంలో నాని 'కృష్ణార్జున యుద్ధం' సినిమాలో రాయలసీమ యాసతో అదరగొట్టాడు. ఆయన 'టక్ జగదీష్' సినిమా కోసం గోదావరి జిల్లాల ప్రజలు మాట్లాడే యాసతో మాట్లాడబోతున్నాడు. ఇక నాని, సుధీర్ బాబు ప్రధాన పాత్రల్లో తెరకెక్కిన వి ఎప్పుడో విడుదలకావాల్సి ఉండగా.. కరోనా వల్ల ఈ సినిమా రిలీజ్ వాయిదాపడింది.