మేమంతా ఒక్కటే అని ఇంకో సారి సంకేతమిచ్చిన సినీ హీరోలు

ఇప్పుడు  సినీ పరిశ్రమలో పోటీతత్వం తో పాటు స్నేహ బంధం కూడా ఎక్కువగానే ఉందని చెప్పాలి. దానికి నిదర్శనమే రామ్ చరణ్, జూనియర్ ఎన్టీఆర్ . వీరిద్దరూ కలిసి నటించిన సినిమా RRR . రాజా మౌళి దర్శకత్వంలో వస్తున్న ఈ సినిమా జనవరి 7వ తారీఖున ప్రపంచ వ్యాప్తంగా విడుదలకు సిద్ధమైన సంగతి తెలిసిందే. ఈ సినిమాలో వారు పోషించిన పాత్రలు కూడా వారి స్నేహాన్ని మరింత బలపరిచాయి. ఈ సినిమా ప్రీ రిలీజ్ ఈవెంట్ ను ముందుగా ముంబైలో నిర్వహించారు. తరువాత చెన్నైలో  జరిపారు. రామ్ చరణ్ పేరులో తమ ఇద్దరి పేర్లు కలిసున్నట్టుగానే తాము కూడా ఎప్పటికి కలుసుంటామని ఎన్టీఆర్ అంటే తాను చనిపోయేంతవరకూ తమ సోదర బంధం కొనసాగుతుందని చెన్నై వేదికపై చరణ్ చెప్పడం జరిగింది. ఈ ఇద్దరి మాటలు కూడా అభిమానులను ఎంతగానో ఆకట్టుకుంటున్నాయి.

నిన్న రాత్రి 'త్రివేండ్రం'లో జరిగిన ఈవెంట్ లోను చరణ్ తమ స్నేహాన్ని గురించి ప్రస్తావించాడు. ఎన్టీఆర్ తనలో ఒక భాగమని చెప్పడంతో అక్కడికి వచ్చిన వాళ్లంతా తమ ఆనందాన్ని వ్యక్తం చేశారు. ఎన్టీఆర్ తో కలిసి పనిచేసే అవకాశం లభించడం తన అదృష్టమనీ ఆయనతో కలిసి పనిచేసే ప్రతి నిమిషాన్ని తాను ఎంజాయ్ చేశానని అన్నాడు. ఆ తరువాత ఎన్టీఆర్ మాట్లాడుతూ, చరిత్రలో చరణ్ తో ముడిపడిన ఈ బంధాన్ని ఇచ్చిన రాజమౌళికి తాను ఎప్పుడూ రుణపడి ఉంటానని చెప్పాడు. చరణ్ కూడా తనలో ఒక భాగమనీ, ఏ భాగమని అడిగితే ఎడమ భాగమని చెబుతాననీ ఎందుకంటే గుండె ఎడమవైపే కదా ఉంటుందని అన్నాడు. ఎన్టీఆర్ ఆ మాట అనగానే చరణ్ గబా గబా ఆయన దగ్గరికి వచ్చి ఆప్యాయంగా ఆలింగనం చేసుకున్నాడు. మేమంతా బాగానే కలిసి ఉంటాం కానీ మా అభిమానులు మాత్రం విభేదాలతో ఉంటారు, ఆలా ఉండకుండా సినిమాని  వినోదం కోసం మాత్రమే చూడాలని , మన కుటుంబాల కన్నా మనకి ఎవరు ముఖ్యం కాదు అని చెప్పకనే, చేతల్లో చూపించారు అని కొంత మంది టాక్.