కన్నడ నాట ఆర్ ఆర్ ఆర్ కు జేమ్స్ ఎదురుదెబ్బ

కన్నడ పవర్ స్టార్, దివంగత పునీత్ రాజ్ కుమార్ ఆఖరి చిత్రం జేమ్స్. ఈ సినిమా చిత్రీకరణ పూర్తైనతర్వతే పునీత్ ఆకస్మిక గుండెపోటుతో అకాల మరణం చెందాడు. జేమ్స్ సినిమా కోసం పునీత్ అభిమానులు ఎంతగానో ఎదురు చూసారు. ఎట్టకేలకు ఈ సినిమా పునీత్ జయంతిని పురస్కరించుకుని మార్చి 17న ధియేటర్లలోకొచ్చింది. మొదటి షోతోనే సూపర్ హిట్ టాక్ సొంతం చేసుకుని, విడుదలైన నాలుగు రోజుల్లోనే వందకోట్లు సంపాదించింది. పునీత్ చివరి చిత్రం కావటంతో ప్రేక్షకులు ఈ సినిమాపై అమితాసక్తి చూపించారు. దీనినికితగ్గట్టుగానే ఈ సినిమాకి మొదటి మూడు రోజులు థియేటర్లు హౌస్ ఫుల్ అయ్యాయి. 

అయితే ఈ సినిమా విడుదల ముందు కర్ణాటక డిస్ట్రిబ్యూటర్స్, సినీ పరిశ్రమ ఒక వారం రోజులు జేమ్స్ సినిమా తప్ప ఇంకేం సినిమా కర్ణాటకలో రిలీజ్ చేయకూడదని నిర్ణయం తీసుకున్నారు. నేటితో జేమ్స్ చిత్రం విడుదలై వారం కావస్తుంది. దీంతో జనాలు తగ్గిన కొన్ని సెంటర్లలో ఈ సినిమాని తీసెయ్యబోతున్నారు. రేపు దేశవ్యాప్తంగా ఆర్ ఆర్ ఆర్ విడుదల కానున్న నేపథ్యంలో కర్ణాటకలోని కొన్ని థియేటర్లలో ఆర్ ఆర్ ఆర్ ను ప్రదర్శించాలనుకుంటున్నారు. ఇక్కడే అసలుచిక్కంతా వచ్చింది. 

పునీత్ అభిమాన సంఘాలు, కొన్ని రాజకీయ పార్టీలు ఇందుకు వ్యతిరేకంగా నిరసన వ్యక్తం చేస్తున్నాయి. కొందరు నాయకులు, పునీత్ అభిమానులు జేమ్స్ సినిమాకు మద్దతుగా మైసూరులో ర్యాలీ కూడా చేసారు. కర్ణాటక కాంగ్రెస్ నేత సిద్ధరామయ్య మాట్లాడుతూ.. వేరేభాషల సినిమాల కోసం జేమ్స్ సినిమాను బలవంతంగా థియేటర్ల నుండి తొలగించటం బాధాకరం అని తెలిపారు. మరో బీజేపీ నేత మాట్లాడుతూ... కన్నడ కంఠీరవ రాజ్ కుమార్ కుమారుడు పునీత్ అకాల మరణం తర్వాత ఆయన ఆఖరి చిత్రంగా విడుదలైన జేమ్స్ ను పక్కనపెట్టి వేరే భాషల సినిమాలను విడుదల చేయటం కరెక్ట్ కాదు. రాష్ట్రంలో ముందుగా కన్నడ సినిమాలకు మాత్రమే ప్రాధాన్యం ఇవ్వాలి. అని అన్నారు. 

దీంతో రేపు విడుదల కానున్న ఆర్ ఆర్ ఆర్ పై జేమ్స్ చిత్ర ప్రభావం ఖచ్చితంగా పడనుంది. కలెక్షన్ల పరంగా ఆర్ ఆర్ ఆర్ కు జేమ్స్ చిత్రం అడ్డుగా ఉందనే చెప్పాలి.