అది .. మెగాస్టార్ అంటే.. ఒకరోజులో మూడు సినిమాల షూట్స్...

ఇటీవలి కాలంలో ఒక హీరో నుండి ఒక సినిమా రావాలంటే ఖచ్చితంగా ఒకటి నుండి రెండు సంవత్సరాల కనీస సమయం పడుతుంది. ఇక పాన్ ఇండియా సినిమాలు, భారీ బడ్జెట్ సినిమాలకు హీరోలు ఏకంగా సంవత్సరాల కొద్దీ  టైంను తీసుకుంటున్నారు. కానీ అలనాటి హీరోలు ఒకే సమయంలో రెండు మూడు సినిమాలు చేస్తూ చాలా బిజీగా ఉండేవారు. ఒక హీరో నుండి సంవత్సరానికి కనీసం రెండు మూడు సినిమాలైనా ఖచ్చితంగా వచ్చేవి. మెగాస్టార్ చిరంజీవి కూడా అలాంటి వాతావరణంలో పని చేసి ఇంతటి స్థాయికి ఎదిగిన వ్యక్తి. అందుకే ఇప్పుడు కూడా ఆయన ఒకేసారి రెండుమూడు సినిమాలు చేస్తూ తన అలవాటును కొనసాగిస్తున్నారు. ప్రస్తుతం చిరు గాడ్ ఫాదర్, భోళా శంకర్, చిరు#154 వంటి మూడు సినిమాలలో నటిస్తూ ఇప్పటితరం యువహీరోలకు సవాళ్లు విసురుతున్నారు. 

మెగా ప్రిన్స్ వరుణ్ తేజ్ నటించిన కొత్త సినిమా గని. ఆ సినిమా ప్రొమోషన్స్లో భాగంగా జరిగిన ఒక ఇంటర్వ్యూలో చిరంజీవిగారి గొప్పతనాన్ని కొనియాడారు వరుణ్. 'సాధారణంగా పొద్దున్న తొమ్మిదింటి నుండి రాత్రి తొమ్మిదింటి వరకు చేసే షూటింగులకు మేము అలసిపోతున్నాం. కానీ రెండు వారాల క్రితం చిరంజీవి గారు ఒకే రోజులో మూడు చిత్రాల షూటింగులో పాల్గొన్నారు. ముంబైలో ఒక మూవీ షూట్ కంప్లీట్ చేసి ఫ్లయిట్ ఎక్కి ఇంటికొచ్చి భోజనం చేసి, మళ్ళీ ఇంకో సినిమా షూటింగులో పాల్గొని, మూడు గంటలు రెస్ట్ తీసుకుని ఆ తర్వాత మరో సినిమా షూటింగ్ చేసారు.. ఈ వయసులో ఇంతటి స్టార్డం వచ్చాక ఆయనకు అంత కష్టపడాల్సిన అవసరం ఏమాత్రం లేదు. కానీ ఆయన కష్టపడుతున్నారు. అది కదా చిరంజీవి అంటే మరి. అందుకే మాలాంటి ఎంతోమందికి ఆయన రోల్ మోడల్ గా ఉన్నారు... అంటూ తన పెదనాన్నగొప్పతనాన్ని వరుణ్ చెప్పుకొచ్చాడు.